Link açıqlığı

Smedlâyev: Aqmescitte mahkeme «Hizb ut-Tahrir» işi» boyunca qabaatlanğan kişiniñ yaqalanuvını lâğu etmek muracaatını baqacaq


Generic – Isolated business man arrested with handcuffs on his back

Mayıs 6-da Aqmescitte Rusiyege boysunğan mahkeme «Hizb ut-Tahrir» işi» boyunca qabaatlanıp, aprel 18-de tutulğan Arsen Cepparovnıñ yaqalanuvını lâğu etmek muracaatını baqacaq. Bu aqta Qırımtatar Qurultayınıñ Merkeziy saylav komissiyasınıñ reisi Zair Smedlâyev bildirdi.

«Saat 11:30-da Aqmescitteki Kiyev rayon mahkemesiniñ Arsen Cepparovnıñ apiste bulunması qararını lâğu etmek Cepparovnıñ imayesi bergen muracaatını baqacaqlar», – yazdı o Facebook saifesinde.

Mayıs 6-da «fevral 26 işi» boyunca qabaatlanğan Meclis reisiniñ muavini Ahtem Çiygoznıñ apiste bulunma müddetini uzattırmaq qararını lâğu etmek onıñ imayesi bergen muracaatı da baqılacaq.

Aprel 18-de Qızıltaş köyünde (Yalta) Rusiye uquq qoruyıcıları tintüv keçirip, eki qırımtatarı - Refat Alimov ve Arsen Cepparovnı yaqaladılar. Rusiyege boysunğan Qırım prokurorı Natalya Poklonskaya aprel 18-de Yaltada «Hizb ut-Tahrir» ile bağda olğanında şeklengen eki insan yaqalanğanını bildirdi.

Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Dörtü de Aqmescitte SİZOda buluna. Teşkilâtqa alâqaları olmağanını aytalar.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG