Link açıqlığı

Ukrainada qırımtatar sürgünligi yıllığına başığlanğan «Genotsidni başımdan keçirdim» kampaniyası başlana


İllüstratsiya fotoresimi

Mayıs 5-te Kiyevde Ukraina Haber siyaseti nazirligi 1944 senesi sürgünligi – qırımtatar halqınıñ genotsidiniñ yıllığına bağışlanğan «Mayıs 18-de epimiz – qırımtatarmız» kampaniyasını taqdim etti. Kampaniya-2016 «Genotsidni başımdan keçirdim» şiarınen keçirilecek.

Bu aqta Ukraina nazirliginiñ matbuat hızmeti bildire.

Beyanatta bildirilgenine köre, aktsiyanıñ maqsadı ukrain ve halqara toplulıqlarnı qırımtatarlar 1944 senesi başından keçirgen sürgünlik faciası aqqında haberdar etmektir.

Nazirlikte 1944 senesindeki vaqialarnı Qırım Rusiye tarafından işğal etilgen soñ yarımadada qırımtatar halqınıñ zemaneviy vaziyetinen qıyaslaylar.

«Qırımtatarlarnıñ tarihında 3 «qara» kün bar: 1783 senesi ilk işğali, o vaqıt qırımtatar halqınıñ üçte bir qısmı repressiyalardan köçip, Qırımnı terk etti. 1944 senesi sürgünligi, sayımıznı eki qat eksiltti ve bizni vatanımızdan marum etti. 2014 senesi işğali da genotsid siyasetiniñ devamı ola, amma başqa şekilde», – dep qayd etti Ukraina Haber siyaseti naziriniñ birinci muavini Emine Ceppar.

Onıñ fikirince, işbu kampaniya, ilk evelâ, qırımtatarlar aqqında daa çoq bilmege istegen ukrainler içün yapılğan.

«Ukrainler ve qırımtatarlarnıñ çoq oşağan şeyleri bar. Halqlarımıznıñ genetik hatırasında genotsid ağrısı bar. Açlıq (golodomor) ve sürgünlik – bir nizam tarafından yapılğan facialardır. Onıñ maqsadı azatlıqqa tartqan duyğusını yoq etmektir, böyle duyğu qırımtatarlarnı ukrainlernen birleştire», – dedi Ceppar.

Meclis azası Gayana Yüksel Meclisniñ Ukraina ükümetinen beraberlikte Sürgünlik qurbanlarını añma kününe bağışlanğan bir sıra merasimlerni azırlağanını bildirdi.

Bundan da ğayrı, Qırımdaki vaqialarnı közetken ve vatanğa bağlı olğan qırımtatarlar yaşağan yerlerde, bu cümleden Türkiye, Almaniya, Kanada, Amerika ve Avropanıñ diger devletlerinde merasimlerniñ keçirilecegi aqqında bildirile.

Mayıs 5-te Ukraina Nazirler kabineti qırımtatar halqınıñ sürgünligi matem kününe bağışlanğan merasimlerniñ planını tasdıqladı. Ukraina Medeniyet nazirliginiñ malümatına binaen, bütün merasimlerniñ keçirilmesi Qırımtatar Milliy Meclisi ile uyğunlaştırılğan.

Rusiyege boysunğan Qırım ükümeti de matem kününde kütleviy mitinglersiz keçirilecek merasimlerniñ planını tasdıqladı.

Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.

Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.

Kiyevde ve bütün Ukraina boyunca bir sıra merasimler teşkil etilecek: kütleviy mitingler keçirilecek, mekteplerde qırımtatar halqınıñ sürgünligine bağışlanğan dersler berilecek ve ilâhre.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG