«Rusiye kommunistleri» firqasınıñ Qırım bölüginiñ yolbaşçısı Leonid Graçnıñ fikirince, şimdiki vaqıtta işğal etilgen Qırımdaki ükümette bulunğan qırımtatar halqınıñ temsilcileri halqnı birleştirmeyler, aksine, böleler.
Bu aqta o Qırım.Aqiqat Radiosınıñ saba yayınında mayıs 3-te keçirilgen Hıdırlez bayramına bağışlanğan merasimlerine izaat berip, bildirdi.
«Qırımtatarlarnıñ eñ yahşı timsali olmağanlar kene de halqnı bir qaç parçağa böldi. Kene de memuriy resursnı qullanmağa başlaylar. <…> Çeşit türlü Balbekler, İlyasovlar ve digerler. Olar bugün ükümet elindeki aletlerdir», – dedi Leonid Graç.
O, bu sene yarımadada keçirilgen Hıdırlez merasimini tenqit etti ve onı «bozuq» dep adlandırdı. Onıñ fikirince, bunıñ esas sebebi memuriy resursnıñ qullanılmasıdır.
Hıdırlez türk halqlarınıñ eñ büyük bayramlarından biri ola, onı XIX asırda üç kün devamında qayd ete ediler. Onı mayıs 6-da, Hıdır (al-Hıdır) ve İlyas azizleriniñ yer yüzünde körüşkenleri künü olaraq qayd eteler. Rusiye tarafından işğal etilgen Qırımda bu bayramğa bağışlanğan merasim mayıs 3-te teşkil etildi. İçtimaiy ağlarda rusiyeli Qırım ükümeti devlet müessiselerde çalışqanlarnı ve mektep talebelerini bayramğa kelmege mecbur etken vesiqa derc etildi.
Qırımtatar Milliy Meclisiniñ temsilcileri Qırımnıñ rusiyeli ükümeti tarafından teşkil etilgen Hıdırlez bayramına bağışlanğan merasimlerde iştirak etmege red etkenlerini bildirdi. Böyle merasimlerden vatandaşlarnı da vazgeçmege çağırdılar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
