Rusiye tarafından işğal etilgen Qırımda mahkeme «maşina yaquvı» işi boyunca şeklenilgen eki kişiniñ apiste bulunma müddetini uzattırdı. Bu aqta Qırım.Aqiqatqa Qırımtatar Qurultayınıñ Merkeziy saylav komissiyasınıñ reisi Zair Smedlâyev bildirdi.
«Eki kişiniñ apiste bulunma müddetini endi uzattırdılar – iyül 23-ke qadar. Şimdiki vaqıtta, ihtimal, aynı böyle tez şekilde üçünci kişiniñ de müddetini uzattıracaqtırlar. Alvapov ve Kudrâşovnıñ müddetlerini uzattırdılar, şimdiki vaqıtta Butnikniñ meselesi çezile», – dedi Smedlâyev.
Yanvar 23-te Alupka ve Simeizde üç yerli sakin yaqalandı, olarnıñ arasında 21 yaşındaki qırımtatar kişi Muyedin Alvapov oldı, olarnı Qırımnıñ cenüp yalısında maşinalarnı yaqqanlarında qabaatlaylar. Umumen olaraq, 2016 senesi yanvar ayında Büyük Yaltada 12 maşina yandı.
Zair Smedlâyevniñ bundan evel Facebook saifesinde yazğanına binaen, «Muyedin yanvar 23-ten başlap SİZOda bulunğanına baqmadan, maşinalarnı ateşke berüvlerniñ sayısı eki qat ziyade oldı! Aynı bu iş boyunca Çelâbinsk şeeri sakini de yaqalandı, onı ava limanında tuttılar».
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
