Link açıqlığı

Saatnıñ esas haberi

Qırımda mayıs 4-te mahkeme «maşinalarnı yaqqanında» qabaatlanğan Muyedin Alvapovnıñ apiste bulunma müddetiniñ uzattırılmasını baqacaq – Smedlâyev


Rusiye tarafından işğal etilgen Qırımdaki mahkeme, maşinalarnı yaqqanında şeklenilip, yanvar ayında yaqalanğan Muyedin Alvapovnıñ apiste bulunma müddetiniñ uzattırılmasını baqacaq. Bu aqta Qırımtatar Qurultayınıñ Merkeziy saylav komissiyasınıñ reisi Zair Smedlâyev Facebook saifesinde bildirdi.

«Oldı, bayram bitti, repressiya maşinasını işletmek içün vaqıt keldi! Yarın saat 14:00 Aqmescitteki Kiyev rayon mahkemesinde maşinalarnı yaqqanında qabaatlanğan Muyedin Alvapovnıñ apiste bulunma müddetiniñ uzattırılması boyunca nevbetteki mahkeme toplaşuvı keçirilecek. Muyedin yanvar 23-ten başlap SİZOda bulunğanına baqmadan, maşinalarnı ateşke berüvlerniñ sayısı eki qat ziyade oldı! Aynı bu iş boyunca Çelâbinsk şeeri sakini de yaqalandı, onı ava limanında tuttılar. Urmaq içün oğlan kerek ve hususan qırımtatar, işte, böyle etip bütün qabaatnı Alvapovğa bermege tırışalar», – yazdı o.

21 yaşındaki Muyedin Alvapov yanvar 23-te Alupkada yaqalandı. Onı Qırımnıñ cenüp yalısında maşinalarnı yaqqanında qabaatlaylar. 2016 senesi mart 14-te Kremlge boysunğan Aqmescitteki Kiyev rayon mahkemesi onıñ apiste bulunma müddetini mayıs 9-ğa qadar uzattırdı.

Alvapovnıñ yaqınları onıñ qabaatlı olmağanında eminler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG