Link açıqlığı

«Hizb ut-Tahrir» işi» boyunca qabaatlanğanlar Aqyarda dava işi malümatınen tanış oldı – adliyeci


Rusiye taqiqatı tarafından «Hizb ut-Tahrir» ile bağ tutqanlarında qabaatlanğan Qırım sakinleri Ruslan Zeytullayev, Rustem Vaitov, Nuri Primov ve Ferat Sayfullayev dava işi malümatınen tanış oldılar ve endi mahkemeni bekleyler. Bu aqta Qırım.Aqiqatqa adliyeci Emil Kurbedinov bildirdi.

Bundan evel davanı Rostov-na-Donu şeerinde Şimaliy-Qavqaz okrug arbiy mahkemesi baqacağı belli oldı.

Kurbedinovnıñ qayd etkenine köre, ilk mahkeme toplaşuvı ne vaqıt keçirilecegi daa belli degil. «Bekleymiz... Mına-mına...» – dedi o.

Kurbedinovnıñ sözlerine binaen, «Hizb ut-Tahrir» ile bağ tutqanlarında qabaat sırlı şaatlarnıñ delillerine, audio yazılmalarınıñ diñlenmesine ve olardan alınğan diniy kitaplarğa esaslana.

Emil Kurbedinovnıñ tahmin etkenine köre, şaatlar mahkeme toplaşuvı zalında bulunmaycaqlar.

«Vedio konferentsiya bağı vastasınen deñiştirilgen sesnen (şaatlarnı sorğuğa çekecekler – QA)... Aqlanmaq imkân olmaz, eger tesadufiy bir şey olmasa...», – dedi adliyeci.

O, şaatlardan biri, ihtimal, rusiyeli mahsus hızmetlerniñ agenti olğanını qayd etti.

Kurbedinov, «Hizb ut-Tahrir» ile bağ tutqanlarında qabaatlanıp Aqyarda yaqalanğan dört kişiden biri terroristik teşkilâtnı teşkil etkeninde qabaatlana, Rusiyede ise bunıñ içün ebediyen apiste bulunma közde tutula.

Bundan evel Kremlge boysunğan Aqyar prokuraturası dört Aqyar sakini Rusiyede yasaq olğan «Hizb ut-Tahrir» teşkilâtında iştirak etkenlerinde qabaatlanıp, mahkemege celp etilecegini bildirdi.

2015 senesi qışta Aqyarda dört musulman kişi yaqalandı: Ruslan Zeytullayev, Rustem Vaitov, Nuri Primov ve Ferat Sayfullayev. Olarnı Rusiyede «ekstremistik» sayılğan «Hizb ut-Tahrir» teşkilâtı ile bağ tutqanlarında qabaatlaylar.

«Hizb ut-Tahrir» halqara islâm siyasiy firqası ola. Onıñ resmiy olaraq qayd etilgen maqsadı islâm devletini qurmaq ve musulman yaşayış tarzını tiklemektir. Bu teşkilât Rusiye, Qazahistan ve Almaniyada yasaqlanğan, amma Ukraina ve diger devletlerde onıñ faaliyeti yasaq degil.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG