Moskvağa boysunğan Rusiye tarafından işğal etilgen Qırım ükümeti teşkil etken Hıdırlez merasiminde evelden tahmin etilgen sayıdan iştirakçilerniñ kerçek sayısı bayağı azca oldı. Bu aqta Qırımtatar Milliy Meclisiniñ reisi Refat Çubarov Facebook saifesinde yazdı.
«Tahmin etkenimiz kibi, rusiyeli işğalciler tarafından teşkil etilgen «bayram» iştirakçileriniñ kerçek sayısı pek az oldı, işğalciler ise «40 – 50 biñ insannıñ» kelecegini aytqan edi», – qayd etti Meclis reisi.
Onıñ sözlerine köre, yarımada sakinleri merasimde eñ çoq devlet müessiseleriniñ hadimleri bulunğanını bildire, olarnıñ bayramğa ketirilmesini teşkil ettiler.
«Bu sene rolüni begenmegen, istemeyip razı olğan devlet hadimleri ve artistlerniñ arasında, qırımtatar olmağan, amma aşamağa ve bedava kezmege pek memnün olğan şahıslar pek yahşı köründi. Bu bedava ziyafetni sevgenlerni ziyafet yerine bedava ketirgenlerini da aytsaq, o vaqıt «bayram» nasıl olğanını añlay bilemiz. Bu bayramnı işğalciler, aynı vaqıtta Qırımda qırımtatar halqına qarşı kütleviy repressiyalar yapıp, teşkil ettiler», – dep ayttı Çubarov.
Kremlge boysunğan yarımada ükümetiniñ saytında bayram iştirakçileriniñ sayısı aqqında malümat yoq.
Hıdırlez türk halqlarınıñ eñ büyük bayramlarından biri ola, onı XIX asırda üç kün devamında qayd ete ediler. Onı mayıs 6-da, Hıdır (al-Hıdır) ve İlyas azizleriniñ yer yüzünde körüşkenleri künü olaraq qayd eteler.
Rusiye tarafından işğal etilgen Qırımda bu bayramğa bağışlanğan merasim mayıs 3-te teşkil etildi.
İçtimaiy ağlarda rusiyeli Qırım ükümeti devlet müessiselerde çalışqanlarnı ve mektep talebelerini bayramğa kelmege mecbur etken vesiqa derc etildi.
Bundan evel Qırımtatar Milliy Meclisiniñ temsilcileri Qırımnıñ rusiyeli ükümeti tarafından teşkil etilgen Hıdırlez bayramına bağışlanğan merasimlerde iştirak etmege red etkenlerini bildirdi. Böyle merasimlerden vatandaşlarnı da vazgeçmege çağırdılar.
Saçuv işleri başlanmasınıñ timsali olğan qırımtatar halq Hıdırlez bayramı Kiyevde «Qırım alanında» («Krımskaya polâna») «PaskaFest» festivali çerçivesinde keçirilecek.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
