Rusiyeli ve ukrain ekspertler 2014 senesinden soñ, ziyaretni Ukrainanen uyğunlaştırmayıp, işğal etilgen Qırımğa kelgen avropalı siyasetçilerniñ öz devletlerinde siyasiy itibarı yoq olğanı ve olar «öz firqalarında bile ekinci dereceli siyasetçiler» olğanı aqqında bir fikirge keldiler.
Böyle fikirni ekspertler Qırım.Aqiqat Radiosınıñ saba yayınında bildirdiler.
Avropa-Atlantik işbirligi İnstitutınınıñ eksperti Andreas Umlandnıñ fikirince, bu kibi siyasetçiler Avropanıñ «sağ ve sol ekstremistlerini» temsil eteler.
«Men bu adamlarnı böyle şekilde ayırır edim: bir taraftan büyük siyaset oynamağa istegen, amma öz devletiniñ milliy siyasetinde itibarı olmağan siyasetçiler. Ekinci kategoriya – bu ekstremistlerdir, sağ ekstremistler, sol ekstremistler, qaysı birleriniñ, kene de, öz devletleri siyasetinde büyük rolü olmağan, amma olar böyle yolnen Avropada büyük devletnen iş tutmağa isteyler. Ya da bu siyasiy quvulğanlar, Silvio Berluskoni kibi (İtaliya sabıq baş naziri – QA), olar, belki de, emiyetli şahıslar ola, amma öz devletiniñ milliy siyasetinden, em de Avropa siyasetinden ayırılğanlar ve bunıñ içün olar Putinnen (Rusiye prezidenti – QA) işbirlik tuta», – dep belley Umland.
Onıñ qayd etkenine köre, şimdiki vaqıtta Rusiye prezidenti Vladimir Putinniñ «Avropa Birliginde emiyetli ortaqları qalmadı».
Bu fikirge programmanıñ diger musafiri – rusiyeli siyasetşınas İvan Preobrajenskiy qol tuttı. Onıñ fikirince, Qırım Rusiye tarafından işğal etilgen soñ yarımadağa kelgen siyasetçiler «öz firqalarından bile ayırılğan marginallar» ola.
«Bir söznen bütün bu adamlarnı tasvir etmek mümkün degil, çünki olarnıñ maqsatları sıq-sıq farqlı ola. Bazıları, kerçekten, baqmaq içün kele. İç olmadım, 2014 senesiniñ soñunda – 2015 senesiniñ başında ziyaretler böyle edi, olarğa, er alda, Rusiye Federatsiyasınıñ tarafından destek kösterilgeni belgilene. Digerleri, kerçekten, (Rusiye tarafından Qırım işğaline – QA) qol tutmaq içün kele, bu kibi insanlar da çoq. Olarnıñ çoqusı, kiçik istisnanen, öz milliy siyasetinden bile ayırılğan marginallar ola», – dep qayd etti Preobrajenskiy.
10 frenk deputatınıñ eyyeti «Milliy areket içün birlik» firqasından olğan Tyeri Mariani yolbaşçılığında keçken sene iyül 23-24 künleri Qırımnı ziyaret etti. Olar öz ziyaretini Ukrainanen uyğunlaştırmadı, Frenkistan Tışqı işler nazirligi ise ziyaretke qarşı çıqtı.
2015 senesi Yunanistandaki Korinf şeer yolbaşçısı Aleksandros Pnevmatikos, bu sene mart 30-da ise yunanistanlı iş adamları eyyeti Korinf şeeri belediyesiniñ turizm inkişafı boyunca şurasınıñ azasınıñ yolbaşçılığında Qırımnı ziyaret ettiler.
Bu sene fevral ayında Qırımğa Yunanistandaki Aleksandrupolis şeer yolbaşçısı Evangelos Lambakisniñ yolbaşçılığında eyyet, yerli iş adamlarınen beraberlikte buyurdı.
2016 senesi fevral ayında işğal etilgen Yalta memurlarını Frenkistandaki Nitstsa şeer yolbaşçısı Kristian Estrozi qabul etti. Yaltadan eyyet Rusiyege boysunğan şeer memuriyetiniñ yobaşçısı Andrey Rostenko ve Frenkistandaki Rusiye elçisi Aleksandr Orlov ile beraberlikte bu sene fevral 29-dan mart 1-ge qadar Nitstsada bulundılar. Olar işbirlik aqqında añlaşmalar imzaladılar.
Qırım işğal etilgen soñ yarımadağa İsrail knessetiniñ Tasil, medeniyet ve sport komitetiniñ reisi Yaakov Margi ve İtaliya sabıq baş naziri Silvio Berluskoni kelgen ediler. Berluskonini Rusiye Federatsiyası prezidenti Vladimir Putin qabul etti.
2016 senesi aprel ayında rusiyeli Qırım ükümeti Avropa parlamentiniñ eki deputatı Almaniyalı Markus Prettsel ve Çehiyalı Yaromir Kohliçek Yalta iqtisat forumında iştirak etkenleri aqqında bildirdi. Forum Rusiye tarafından işğal etilgen Qırımda keçirilgen edi. Daa eki deputat – Aksel Kasseger ve Barbara Rozenkrants Avstriya Cumhuriyetiniñ parlamentini temsil etken ediler. Stefano Valdegamberi bu yerde İtaliya vilayet saylav organını temsil ete edi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
