Qırımda diger yerlerde Hıdırlez keçirilmesini yasaq etip, ükümet tarafından teşkil etilgen Hıdırlez bayramına adamlarnı toplaylar. Hususan, Yaltada yerli sakinlerge bu bayramnı keçirmege yasaq ettiler, bunı havfsızlıq tedbirlerini teminlemek imkânı olmağanınen añlattılar.
Yalta memuriyeti tarafından red etüv boyunca mütenasip vesiqa Qırım.Aqiqatnıñ maiyetindedir.
«2016 senesi mayıs 3-te Köreiz köyünde Hıdırlez bayramını keçirmek muracaatıñıznı baqıp, Yalta memuriyeti bu merasimniñ keçirilmesine, havfsızlıq tedbirlerini teminlemek imkânı olmağanı sebebinden, rushset bermey», – dep aytıla vesiqada.
«Mayıs 3-te Bütün Qırım milliy qırımtatar Hıdırlez bayramı «Şaherezada» medeniy-eglence merkeziniñ territoriyasında teşkil etile. Yalta memuriyetiniñ havfsızlıq tedbirlerini teminleme imkânları işbu bayram merasimine berilecek», – dep qayd eteler memuriyette, ve istegenlerge Hıdırlez bayramını qayd etmek içün Bağçasaray rayonına yol almağa tevsiye eteler.
2016 senesi mayıs 3-te Rusiyege boysunğan Qırım ükümeti qırımtatar Hıdırlez bayramını teşkil ete. Bayram programmasında Qırımnıñ çeşit regionlarından ketirilgen milliy çadırlar tiklenilecek. Bu yerde qırımtatar halqınıñ ayat tarzı ve adetleri, dekorativ-ameliy sanat ustaları işleriniñ sergisi, milliy aşlar ve Dağıstanlı canbazlarnıñ çıqışları taqdim etilecek.
İçtimaiy ağlarda rusiyeli Qırım ükümeti devlet müessiselerde çalışqanlarnı ve mektep talebelerini bayramğa kelmege mecbur etken vesiqa derc etildi.
Bundan evel Qırımtatar Milliy Meclisiniñ temsilcileri Qırımnıñ rusiyeli ükümeti tarafından teşkil etilgen Hıdırlez bayramına bağışlanğan merasimlerde iştirak etmege red etkenlerini bildirdi. Böyle merasimlerden vatandaşlarnı da vazgeçmege çağırdılar.
Qırımdan köçkenler Hıdırlez bayramına bağışlanğan merasimlerni qıtaiy Ukrainada teşkil eteler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
