Link açıqlığı

Mayıs 3-te Qırımda ükümet tarafından teşkil etilgen qırımtatar baar Hıdırlez bayramını qayd eteler. Merasim saba saat 10-da Aqmescit-Bağçasaray yolunıñ kenarındaki meydanda başlandı. Bu yerde yarımadanıñ çeşit şeer ve rayonlarından ketirilgen çadırlar yerleştirildi, olarnıñ içinde ameliy sanat sergileri taqdim etilgen, canlı ticaret alıp barıla. O yerde bulunğan adamlarnıñ Qırım.Aqiqatqa bildirgen malümatlarına binaen, ziyafet ve suvenirlerniñ fiyatları beklenilgeni kibi pek ucuz degil.

Böyleliknen, bir filcan qave 75-100 ruble (30-40 grn.), pilâv 150 ruble (60 grn.), elva 250-400 ruble (100-160 grn.) fiyatınen teklif etile. Tamğalı maykalar 250-300 rubleden (100-120 grn.) satıla. Bu merasimde eñ çoq satılğan mahsulat ve ziyafettir, dep qayd eteler iştirakçiler.

Balalarnı attraktsionda eglendimek içün ana-babalar bir qaç daqqa içün 150 ruble bermeli.

Rusiyeli Qırım yolbaşçısı Sergey Aksönov ve Qırım parlamentiniñ spikeri Vladimir Konstantinov rusiyeli aktör Mihail Poreçenkov refaqatında Hıdırlezge üylege yaqın keldiler. Olar beraberlikte sanağa sözge çıqtılar. Merasimde Aksönovğa boyalanğan yımırtalarnı, Konstantinovğa ise pempe örülgen pardoşnı ve qalpaqnı bağışladılar.

İçtimaiy ağlarda rusiyeli Qırım ükümeti devlet müessiselerde çalışqanlarnı ve mektep talebelerini bayramğa kelmege mecbur etken vesiqa derc etildi.

Bundan evel Qırımtatar Milliy Meclisiniñ temsilcileri Qırımnıñ rusiyeli ükümeti tarafından teşkil etilgen Hıdırlez bayramına bağışlanğan merasimlerde iştirak etmege red etkenlerini bildirdi. Böyle merasimlerden vatandaşlarnı da vazgeçmege çağırdılar.

Qırımdan köçkenler Hıdırlez bayramına bağışlanğan merasimlerni qıtaiy Ukrainada teşkil eteler.

Keçken sene saçuv işleri başlanılmasınıñ timsali olğan Hıdırlez bayramı aynı Rusiye ükümetiniñ teşebbüsi ile qayd etilgen edi. Onı mayıs 3-te Aqmescit-Bağçasaray yolundaki «Şaherezada» medeniy-eglence merkeziniñ yanında teşkil ettiler. Ükümetniñ bildirgenine köre, bayramğa 35-40 biñ insan keldi. Merasimniñ teşkil etilmesinde iştirak etmegen Qırımtatar Milliy Meclisi ise, 5-6 biñ insan qayd etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG