Qırımtatar Milliy Meclisi reisi Refat Çubarov eki yıl evel yüz bergen vaqialar aqqında hatırlata. O vaqıt, 2014 senesi mayıs 3-te rusiyeli mahsus hızmetler qırımtatar halqınıñ lideri Mustafa Cemilevge işğal etilgen Qırımğa kirmege yasaq etti.
Onıñ sözlerine köre, bu kün qırımtatarlar Hıdırlez bayramını qayd etmek kerek edi, amma onı lâğu etmek mecbur oldılar.
«Bugün hatırlatmaq kerek ki, Hıdırlez-2014 bayramını lâğu etmek qararı Meclis azaları tarafından aman-aman bir ağızdan qabul etildi. Hıdırlez-2014 teşkilâtçıları Lenur İslâmovnıñ yolbaşçılığında birden Meclisniñ qararını yerine ketirmege başladılar ve mayıs 3-te saba bayram keçirilecek yerde esas inşaatlar cıyıldı», – dep yazdı Refat Çubarov Facebook saifesinde.
«Biñlernen qırımtatarlar, bu cümleden Meclis azaları, Qırımtatar Qurultayı delegatları, mayıs 3-te, saba erte Çonğar tarafına, Qırımnıñ qıtaiy Ukrainanen memuriy sıñırına Mustafa Cemilevni qarşılap onı tuvğan topraqqa ozğarmaq içün yol aldılar...», – qoştı o.
Bunıñ neticesi Cemilevni qarşılağanlarğa qarşı açılğan cinaiy işler, mahkemeler ve para cezaları oldı.
2016 senesi mayıs 3-te Rusiyege boysunğan Qırım ükümeti qrırımtatar Hıdırlez bayramını teşkil ete. Bayram programmasında Qırımnıñ çeşit regionlarından ketirilgen milliy çadırlar tiklenilecek. Bu yerde qırımtatar halqınıñ ayat tarzı ve adetleri, dekorativ-ameliy sanat ustaları işleriniñ sergisi, milliy aşlar ve Dağıstanlı canbazlarnıñ çıqışları taqdim etilecek.
İçtimaiy ağlarda rusiyeli Qırım ükümeti devlet müessiselerde çalışqanlarnı ve mektep talebelerini bayramğa kelmege mecbur etken vesiqa derc etildi.
Bundan evel Qırımtatar Milliy Meclisiniñ temsilcileri Qırımnıñ rusiyeli ükümeti tarafından teşkil etilgen Hıdırlez bayramına bağışlanğan merasimlerde iştirak etmege red etkenlerini bildirdi. Böyle merasimlerden vatandaşlarnı da vazgeçmege çağırdılar.
Qırımdan köçkenler Hıdırlez bayramına bağışlanğan merasimlerni qıtaiy Ukrainada teşkil eteler.
Mustafa Cemilev Rusiye Federal köçüv hızmetine qarşı oña Qırımğa kiriş yasaq olunğanı içün dava açtı. Daa bir dava Federal havfsızlıq hızmetine qarşı açıldı. Şimdiki vaqıtta bu iş boyunca mahkeme taqiqatı Moskva mahkemelerinde alıp barıla.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
