Kremlge boysunğan Qırım ükümeti, mütenasip resmiy emirlerni yollap, emek kollektivleri ve balalar vastasınen «Hıdırlez» bayramı iştirakçileriniñ sayısını arttırmağa niyetlene. Bu aqta Qırımtatar Milliy Meclisi reisiniñ birinci muavini Nariman Celâl aprel 28-de Facebook saifesinde bildirip, Aqmescit memuriyetiniñ Tasil idaresi emiriniñ nushasını paylaştı.
«Mına böyle şekilde «halq» bayramında insanlarnıñ sayısını arttıracaqlar. Devlet müessise ve işhaneleriniñ yolbaşçıları imza qoyıp, öz işdeşlerini ve balalarını bile bayramğa ketirecek, işten çıqaruv ve diger cezalarnen qorquzacaqlar. Teşkilâtçılar unutmasıñ ki, «töpeden manzaranı» videoğa çıqarmasınlar, çünki soñ nasıldır oñaytsız ola», – qayd etti Celâl.
Vesiqa nushasında alıcılarğa «qırımtatar «Hıdırlez» bayramında iştirak etmege», mektep talebeleriniñ merasim keçirilecek yerge ketirilmesini teşkil etmege emir eteler, bundan da ğayrı, o yerde oquv müessiseleriniñ cedveli qayd etilgen.
Kremlge boysunğan Qırım yolbaşçısı Sergey Aksönov qırımtatar Hıdırlez bayramınıñ keçirilmesi boyunca merasimler cedvelini tasdıqladı. Bu yerde dekorativ-ameliy sanat mahsulatı sergisiniñ keçirilmesi, milliy moda taqdimi, qırımtatar medeniyet erbaplarınıñ kontserti, küreş sport yarışı ve diger merasimlerniñ teşkil etilmesi planlaştırıla.
Keçken sene saçuv işleri başlanılmasınıñ timsali olğan Hıdırlez bayramı aynı Rusiye ükümetiniñ teşebbüsi ile qayd etilgen edi. Onı mayıs 3-te Aqmescit-Bağçasaray yolundaki «Şaherezada» medeniy-eglence merkeziniñ yanında teşkil ettiler. Ükümetniñ bildirgenine köre, bayramğa 35-40 biñ insan keldi. Merasimniñ teşkil etilmesinde iştirak etmegen Qırımtatar Milliy Meclisi ise, 5-6 biñ insan qayd etti. Keçken sene temsilci organ vatandaşlarnı Qırımda ükümet tarafından keçirilgen bayramda iştirak etmemege çağırdı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
