Link açıqlığı

Ukraina territoriyasında çalışqan Qırım prokuraturası «Qırımtatar Milliy Meclisiniñ faaliyeti Qırımda qanunsız yasaq etilgeni» sebebinden cinaniy iş açtı.

Ukraina Baş prokuraturasınıñ matbuat hızmetiniñ bildirgenine köre, Ukraina Cinaiy kodeksiniñ 161 maddesinde belgilengen milliy mensüplik sebebinden vatandaşlarnıñ musaviy uquqlığınıñ bozulmasınen bağlı cinayetler boyunca cinaiy iş açıldı.

«Qanunsız teşkil etilgen Qırım Yuqarı mahkemesiniñ mahkemeciler eyyeti Terentyeva N. yolbaşçılığında «Qırımtatar Milliy Meclisi» birleşmesini ekstremistik teşkilâtı olaraq tanıdı ve yarımada territoriyasında onıñ faaliyetini yasaq etti», – dep aytıla beyanatta.

Ukraina prokuraturasında qayd etilgenine köre, böyle areketler «qanunsız sayıla, çünki «Ukrainanıñ vaqtınca işğal etilgen territoriyasında vatandaşlarnıñ aq-uquqlarını ve serbestligini qorçalav» qanunı «Ukrainanıñ vaqtınca işğal etilgen territoriyası Ukrainanıñ toprağı olğanını, ve bu topraqta Ukraina Ana yasası ve qanunları qullanğanını» belgiley.

Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.

2016 senesi fevral ayında Rusiyege boysunğan prokuror Natalya Poklonskaya rusiyeli Qırım Yuqarı mahkemesine Meclis faaliyetini yasaq etmesi boyunca davanen muracaat etti. Mart ayında bu dava boyunca mahkeme ceryanı başlandı. Mahkeme davası alâ daa devam ete.

Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi.

Bundan soñ Ukraina territoriyasında çalışqan Qırım prokuraturası Meclis faaliyetiniñ yasaq etilmesi boyunca taqiqatnı başladı.

Halqara toplulıq Rusiye ükümetiniñ Meclis faaliyetini yasaq etmek qararını takbih etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG