Rusiye tarafından işğal etilgen Qırımda apiste bulunğan Qırımtatar Milliy Meclisiniñ muavini Ahtem Çiygoz yarımadadaki nizamsızlıq aqqında bütün dünya bilsin dep, «bile-bile mahkemeleşkenini» bildire.
Aprel 29-da keçirilgen «fevral 26 işi» boyunca qabaatlanğanlarnıñ apiste bulunma müddetiniñ uzattırılmasınen bağlı mahkemede Ahtem Çiygoznıñ nutqunı Meclis reisiniñ muavini Nariman Celâl Facebook saifesinde paylaştı.
«Men bile-bile mahkemeleşem. Men mahkemege muracaat etem ve qayd etmege isteyim: maña nisbeten yapılğan bu nizamsızlıqnı körmemezlikke urmaq içün irade küçüm bar. Amma men bile-bile mahkemeleşem, çünki Qırımda insan aqları ve qırımtatarnıñ aqları taqiqat, prokuratura ve mahkemeler tarafından ne derecede körmemezlikke urulğanını bütün dünya bilmeli. Qanunda olğan bir, amma episi yapqanı başqa», – dedi Ahtem Çiygoz.
O, onıñ Qırımnı terk etmege niyeti yoq olğanını ve o telükeli olmağanını kene tekrarladı.
«Ve men soñuna qadar mahkemeleşecem, meni apiske qapatacaqlarını bilip, qapatıñız. Men mahkemeleşecem ve epiñiz siyasetçilerniñ emirlerini yerine ketirgen qoqla olğanıñıznı isbat etecem... Eliñizde Rusiye Ana yasası, qanunlar, cinaiy-uquqiy kodeks, Rusiye Cinaiy kodeksi bar, ve siz bular boyunca çalışmaysıñız. Bütün yapqan işiñiz qalplıq, sımarıştır... Men ar-namusımnı qorçalamaq içün küreşecem», – qayd etti siyasetçi.
Aprel 29-da, cuma künü Kremlge boysunğan Aqmescitteki Kiyev rayon mahkemesi Qırımtatar Milliy Meclisiniñ reis muavini Ahtem Çiygoznıñ apiste bulunma müddetini mayıs 22-ge qadar uzattırdı.
Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.
Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. 2016 senesi fevral ayında rusiyeli Qırım Yuqarı mahkemesiniñ toplaşuvında bu işni tekrar taqiq etilmesine yollamağa qarar alındı.
2016 senesi fevral ayında rusiyeli Qırım Yuqarı mahkemesi bu dava işini tekrar taqiqatqa teslim etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
