Link açıqlığı

Qırımtatarlarnıñ öz-özüni idare etüv milliy organları – Qurultay, Meclis – Qırımnıñ tamır halqınıñ menfaatını temsil ete ve ananeviy temsiliy müessiseler ola. Rusiyege boysunğan yarımada ükümeti ilân etken olarnıñ Qırımda deñiştirmeleri, yani yañı temsiliy organ Mecliske reqabet etip olamaz.

Bu aqta Qırımtatar halqınıñ aq-uquqlarını qorçalav boyunca komitetiniñ idarecisi, Meclis azası Eskender Bariyev Qırım.Aqiqatqa bergen izaatında bildirdi.

«Biz milliy temsiliy müessiseler aqqında laf etkende, ananeviy yollarını muzakere etmelimiz. Çünki biz tamır halqı aqqında laf etemiz. Qırımtatarlarnıñ tarihına doğru alâqalı olğan temiz ananeviy yollar – bu Qurultay ve Meclis», – dedi o.

Bariyev yarımada ükümeti qırımtatarlarnıñ temsiliy organlarına oşatqan diger şekillerni qullana bilecegini tahmin etti.

«Bilgenime köre, şimdi olar qırımtatarlarnıñ milliy-medeniy muhtariyetlerini teşkil etmek içün faal şekilde çalışalar, soñra nasıldır assotsiatsiya yapmağa isteyler ve bu qırımtatarlarnıñ temsiliy organı dep, onı taqdim etecekler... Olar, elbet, onı Divan dep adlandıra bileler. Keñeş dep adlandıra bileler (Qırğızistanda yerli öz-özüni idare etüv milliy organ – QA). Bu da türk adlarıdır. Oña çeşit adlar bere bileler», – dep añlattı Bariyev.

Eskender Bariyevniñ qayd etkenine köre, şimdiki vaqıtta mesele bu yañı qurulğan müessiseler hususan qırımtatar halqınıñ temsilcisi olaraq lâyıq olacağı ve olarıñ demokratik şekilde saylanılacağıdır.

«Er angi deñişme lâyıq olamazdır, Qırımtatar Milliy Meclisi mevcuttır. O tek fevqulade faaliyet nizamına keçti», – dedi uquq qoruyıcı.

Rusiyege boysunğan Qırım parlamentiniñ spiker muavini Remzi İlyasov qırımtatarlar yañı temsiliy organnı teşkil eteceklerini ilân etti. İlyasovnıñ qayd etkenine köre, umumhalq qurultayınıñ teşkil etilmesinen oğraşaycaq mahsus milliy komissiyanı tesis etmege qarar alındı. Tahminlerge köre, qurultay bu sene noyabr-dekabr aylarında keçirilecek.

Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.

Meclis reisi Refat Çubarov bundan soñ Qırımtatar Milliy Meclisi faaliyetini fevqulade nizamda devam etecegini dildirdi, çünki onıñ faaliyeti normal şekilde ömürge keçirilmesi içün «yeñilmez manialar» quruldı.

Meclisniñ yasaq etilmesini halqara toplulıqta takbih ettiler.

Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG