Mahsus Qırım.Aqiqat içün
Mence, sovetlerden qalma siyasetçilerniñ 90% ceennemde yanacaq. Amma insanlarnı öldürgenleri ve hırsızlıq yapqanları içün degil, yalan aytqanları esas sebeptir. Siyaset ve cemaat yaşayışınıñ er saasında olğan er künlik, tsinik, çirkin bir yalan. Ukrainada, şükürler olsun, vaziyet eyilişe, amma Rusiyede, añlağanıma köre, yalan devlet siyasetiniñ esası olğan. Meclis yasaqlanmasınıñ siyasiy sebepleri aqqında çoq aytıldı, uquq tarafından aytmaq – aqılğa zarar, bu sebepten Rusiye akimiyetiniñ qırımtatarlarğa bergen vadelerine baqayıq.
2014 senesi mart 11-de Qırım Muhtar Cumhuriyeti Yuqarı Radası sekizinci sessiyasınıñ nevbetten tış plenar toplaşuvında acayip bir vesiqa qabul etilgen edi:
«Qırımtatar halqı aq-uquqlarınıñ ğayrıdan tiklenmesi ve onıñ Qırım cemiyetine integratsiya olmasınen bağlı kefiller aqqında
XX asırda qırımtatar halqınıñ facialı taqdirini añlap, onıñ tarihiy Vatanına avdet etmesi ve yerleşmesini adalet tiklenmesi olaraq tanıp ve qırımtatar halqı aq-uquqlarınıñ ğayrıdan tiklenmesi ve Qırım cemiyetine integratsiya olması kefilleriniñ teminlenmesine isse qoşmağa tırışıp,
Qırım Muhtar Cumhuriyetiniñ
Yuqarı Radası böyle qarar aldı:
Qırım Cumhuriyetiniñ yañı Anayasası tasdıqlansa, qırımtatar halqı aq-uquqlarınıñ ğayrıdan tiklenmesi ve onıñ Qırım cemiyetine integratsiya olması kefillerini köz ögüne almaq...»
Soñra da 13 vade qayd etile, olarnıñ nasıl yerine ketirilgenini aşada köremiz. Bu tatlı sözlerniñ temeli prezident Vladimir Putinniñ Kremlde aynı yılnıñ mayıs 16-da qırımtatarlarnıñ vekillerine aytqan muracaatında mevcut: «Bizler azırmız – federal, regional, ve, eminim, yerli akimiyet – epimiz insanlarnıñ tuvğan topraqlarında raat yaşamalarını can-yürekten, bunı qayd etmek ister edim, istegenlernen beraber çalışmağa azırmız».
Şimdi, menim fikirimce, Rusiye akimiyetiniñ söz tutqanını ve qırımtatarlar tuvğan topraqlarında raat yaşay bilelermi teşkermege vaqıt keldi?
Eki yıldan soñ 2014 senesi akimiyetniñ qırımtatarlarğa bergen on eki vadesinden yalıñız bir danesi yerine ketirildi, o da – deklarativ bir şey. Böylece, şimdiki «Qırım Cumhuriyeti» akimiyetiniñ yalan aytmaq qabiliyeti 91%-dan ziyadedir.
Qısqası, «tebrik etem, arqadaş yalancı».
Andrey Vvedenskiy, Qırım közeticisi
«Fikir» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışları ile aynı olmaması mümkün