Birleşken Milletler Teşkilâtınıñ Havsızlıq şurasında Rusiye temsilcisi Vitaliy Çurkin Havsızlıq şurasınıñ azalarını Qırım aqqında malümatnıñ «qabartqanlarında» qabaatladı ve yarımadanı «istiqrar» territoriyası olğanını ilan etti.
Rusiyeli diplomat bunı Nyu-Yorkta keçirilgen Birleşken Milletler Teşkilâtınıñ Havsızlıq şurasınıñ açıq toplaşuvı devamında bildirdi.
«Amerikan ve ingliz daimiy temsilcileri bugün buhrannıñ başlanılmasını (Ukrainada – QA) Qırımnıñ Rusiyege qoşulğanını saylamağa tırıştı. Qabartmaq kerekmey, ep bir buhrannıñ başlanılmasında öz qabaatıñıznı saqlap olamazsıñız, Qırım ise şimdi, Donbass ve Ukrainağa baqsaq, istiqrar yarımadası ola. Reis efendi, ukrain buhranı devamında Birleşken Milletler Teşkilâtınıñ Havsızlıq şurası teşviqat meydançığı olaraq qullana edi», – dedi Çurkin.
Ukraina Birleşken Milletler Teşkilâtınıñ Havfsızlıq şurasını Rusiye Federatsiyasından qırımtatarlarnıñ aqlarını ğayrıdan tiklemege talap etmege çağıra. Bu aqta toplaşuvda Ukraina Tışqı işler nazirligi apparatınıñ yolbaşçısı-nazir muavini Vadim Pristayko ilân etti.
Birleşken Milletler Teşkilâtında Amerika Qoşma Ştatlarınıñ elçisi Samanta Pauer toplaşuv devamında Qırımnıñ Rusiye tarafından işğali devam etkenini ve Donbasstaki dava Rusiye tarafından desteklengenini bildirdi.
Pauer Rusiyeniñ areketlerinden Ukraina şarqında buhrannıñ sebeplerini unutmamağa çağırdı. O Rusiyeni ateş toqtatmasında ilk adımnı yapmağa ve OSCE nezaret missiyasına dava territoriyasında öz faaliyetini yapmağa ruhset bermege çağırdı.
BMT Havsızlıq şurasınıñ azaları olğan devletleriniñ temsilcileriniñ çoqusı Qırımda insan aqlarınıñ bozmasını qayd etti ve Kremlge boysunğan yarımada ükümeti tarafından Qırımtatar Milliy Meclisiniñ yasaq etilmesini takbih ettiler.
2015 senesi oktâbr ayından başlap Ukraina Birleşken Milletler Teşkilâtınıñ Havfsızlıq şurasınıñ daimiy olmağan azası ola.
Qırım Rusiye tarafından işğal etilgen ve Donbassta silâlı dava bağlaşan soñ teşkilât Ukrainadaki vaziyetinen bağlı bir qaç sefer toplaşuv keçire edi.
Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.
Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
