Ukraina Baş Prokuraturası yanında çalışqan Qırım Muhtar Cumhuriyetiniñ prokuraturası Rusiyege boysunğan Qırım mahkemesi tarafından Qırımtatar Milliy Meclisiniñ yasaq etilmesi boyunca cinaiy iş açtı. Bu aqta aprel 27-de, çarşenbe künü Qırım MC prokuraturasınıñ matbuat hızmeti bildirdi.
«Qırım Muhtar Cumhuriyetiniñ işğalci ükümeti, halqara uquq qaidelerine, Ukraina qanunlarına, dünya toplulığınıñ fikirine emiyet bermeyip, kene de vatandaşlarnıñ aqlarını boza, olarnıñ milliy namusı ve itibarını aşalay», – dep bildirdiler ukrain müessisesinde.
Qırım Muhtar Cumhuriyeti prokuraturasınıñ qayd etkenine köre, mahkemeci Natalya Terentyeva, «içtimaiy-siyasiy vaziyetiniñ müşkülligini añlap, Ukraina qanunlarına rağmen, qanunsız teşkil etilgen Qırım Yuqarı mahkemesiniñ mahkemecisi vazifesine tayinlenmege razı oldı, üküm vekâletini özüne aldı ve 26.04.2016, belgilengen mahkemeniñ mahkemeciler eyyetiniñ reisi olıp, diger mahkemecilernen beraber, Qırım Cumhuriyetiniñ prokurorı Natalya Poklonskayanıñ dava arizasını qanaatlendirmek qararını aldı ve Qırımtatar Milliy Meclisini ekstremistik teşkilâtı olaraq tanıdı ve onıñ faaliyetini yasaq etti».
Qırım Muhtar Cumhuriyetiniñ prokuraturası aprel 26-da Ukraina Cinaiy Kodeksi 161 maddesiniñ 1-ci qısmında (ırq, millet mensüpligi ve diniy işançlarğa köre vatandaşlarnıñ musaviy uquqlığınıñ bozulması) ve Ukraina Cinaiy Kodeksi 353 maddesiniñ 1-ci qısmında (üküm vekâletilgini ya da resmiy şahıs vazifesini ruhsetsiz özüne alması) belgilengen cinayetler alâmetleri boyunca cinaiy işni qayd etti.
Cinaiy işniñ malümatları Ukraina Baş prokuraturasına teslim etildi.
Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.
Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.
Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.
Ukraina Tışqı işler nazirliginde Qırımtatar Milliy Meclisi faaliyetiniñ yarımadada yasaq etilmesini takbih etip, mahkeme qararını «cinayetçilik ve qanunsızlıq» dep adlandırdılar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
