Link açıqlığı

Rusiye tarafından işğal etilgen Qırımda menfaatlarnı qorçalamaq içün bütün uquq vastaları qullanılğan soñ, Qırımtatar Milliy Meclisiniñ temsilcileri İnsan aqları boyunca Avropa mahkemesine muracaat etmege niyetlene.

Bu aqta aprel 26-da Qırım.Aqiqat Radiosınıñ aqşam yayınında Meclis reisiniñ birinci muavini Nariman Celâl bildirdi.

«Biz mahkeme qararınıñ delil qısmını daa körmedik. Bizge bildirgenlerine köre, o aprel 29-da azır olacaq, amma onı, bizge söz bergenlerine binaen, mayıs 4-ke qadar ala bilecekmiz... Bu yerde, Qırımdaki şimdiki vaziyette bulunıp, Meclisniñ faaliyetine aqlarımıznı qorçalamaq içün bütün mümkün olğan ve irişile bilgen uquq vastalarını qullanmağa isteymiz. Bunıñ maqsadı, elbet, bizim tahminlerimizge köre, red etüvlerni alıp, İnsan aqları boyunca Avropa mahkemesine muracaat etmek ve endi o yerde aqlarımıznı qorçalamaqtır», – dep ayttı Celâl.

Meclis reisiniñ muavini rusiyeli Qırım mahkemesi «Meclis añlamı ve sıñırını açıq-aydın köstermemege tırışqanını» bildirdi.

«Umumen olaraq, olarnıñ aytqanlarına köre, Meclis azaları sırasına çeşit adamlarnı qoşalar: olarğa Meclis temsilcileri, Meclis tarafdarları dep aytalar, yani böyle etip Meclis añlamı ve sıñırını açıq-aydın köstermemege tırışalar. Amma vesiqalarımızğa binaen, bu Qurultay tarafından saylanılğan 33 insan... Qayd etmek isteyim ki, biz Qırımtatar Milliy Meclisi añlamına hususan 33 insan kirmesine israr ete edik. Amma memuriy davacımız Qırımtatar Milliy Meclisi añlamına bütün öz-züni idare etüv milliy organlarınıñ azaları kirgenini israr ete edi: Qurultay, saylav komissiyası, bütün regional ve yerli meclisler, bu ise bugünki künde 2000-den ziyade insandır», – añlattı Celâl.

Aynı vaqıtta, Vatandaş azatlığı merkeziniñ idare yolbaşçısı Aleksandra Matviyçuknıñ qayd etkenine köre, Rusiye «İnsan aqları boyunca Avropa mahkemesiniñ qararını yerine ketirmey bile», çünki böyle vaziyetler endi olğan edi.

Aprel 26-da, Kremlge boysunğan Qırım Yuqarı mahkemesi Qırımtatar Milliy Meclisini ekstremistik teşkilâtı olaraq tanımaq ve onıñ faaliyetini yarımada territoriyasında ve Rusiyede yasaq etmek qararını qabul etti. Böyle qararnı rusiyeli mahkemeci Natalya Terentyeva çıqardı. Bu qararnı lâğu etmek içün bir ay devamında muracaat etmek mümkün.

Qırım işğali devamında Meclis Ukrainanıñ topraq bütünligi içün küreşken teşkilâtlardan biri edi.

Mart 3-ten başlap Qırımda Meclisniñ yarımadada yasaq etilmesi boyunca bir sıra mahkeme toplaşuvları keçirile edi. Davanı Rusiye ükümeti tarafından teyinlengen Qırım prokurorı Natalya Poklonskaya açtı.

Aprel 13-te Poklonskaya Qırımtatar Milliy Meclisi faaliyetiniñ toqtatılması boyunca qarar aldı. Bunı Qırım sakinleri tarafından teşkilât faaliyetine şikâyetler kelgeninen añlattı.

Aynı vaqıtta, Aprel 18-de Rusiye Adliye nazirligi Qırımtatar Meclisini Rusiyede «ekstremist faaliyetinden sebep» yasaq etilgen cemaat ve diniy teşkilâtları cedveline kirsetti.

Ukraina, bir sıra halqara teşkilâtlar ve uquq qoruyıcılar böyle areketlerni takbih etti. Ğarbiy liderler, rusiyeli Qırım ükümeti tarafından qabul etilgen bu qararnıñ halqara uquq ve insan aq-uquqlarını bozğanını qayd etip, Meclisniñ yasaq etilmesine qarşı çıqtı. Qırım uquq qoruyıcı gruppası Meclisniñ yasaq etilmesini qırımtatar halqına qarşı yapılğan repressiyalarnıñ neticesi olaraq tanıdı.

XS
SM
MD
LG