Qırımda Meclisniñ faaliyeti yasaq etilgen soñ tek onıñ azaları içün degil de, qırımtatarlarnıñ öz-özüni idare etüv organlarınıñ teşkil etilmesine yardım etkelner içün de telüke bar. Bu aqta Meclis reisi Refat Çubarov ilân etti.
«Tek Meclis azaları içün degil de, amma yerli meclislerniñ ya da öz-özüni idare etüv organlarınıñ teşkil etilmesinde iştirak etken, saylav komissiyalarınıñ azaları olğan, saylayıcı olğan faaller içün de büyük telüke bar», – dep ayttı o aprel 26-da Kiyevde keçirilgen brifingde.
Meclis reisiniñ qayd etkenine köre, onıñ malümatına binaen, yarımada işğal etilgen soñ Qırımdan farqlı milletlerniñ aman-aman 35 biñinsanı köçmege mecbur oldı. Olarnıñ yarısı qırımtatarlarıdır. Bunen beraber, Refat Çubarov şunı bildirdi ki, Mecliste Qırımnı terk etmemege çağırdılar, istisna tek insanlarnıñ ömrülerine doğru havfı ola bile.
Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.
Dava boyunca cevapkâr – Qırımtatar Milliy Meclisi reisiniñ birinci muavini Nariman Celâl Meclis azaları şikâyet arizasını berecegini ilân etti.
Aprel 25-te keçirilgen toplaşuvda mahkeme rusiyeli prokuror Natalya Poklonskayanıñ Meclis faaliyetiniñ toqtatılması boyunca qararını davağa qoştı. Poklonskaya toplaşuvda olmadı.
Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi.
Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.
Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
