Link açıqlığı

Saatnıñ esas haberi

Qırımda mahkeme Meclis faaliyetini yasaq etti


Rusiyege boysunğan Qırım Yuqarı mahkemesi teneffüsten soñ yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti, bunı Qırım.Aqiqat bildire.

«Qırım Cumhuriyeti prokurorınıñ belgilenmegen şahıslar dairesine qarşı davasını qanaatlendirmek. Qırımtatar Milliy Meclisi adlandırılğan birleşmeni ekstremistik teşkilâtı olaraq tanımaq ve onıñ faaliyetini yasaq etmek», – dep oqudı mahkemeci Natalya Terentyeva.

Onıñ bildirgenine köre, bu qararnı lâğu etmek içün bir ay devamında muracaat etmek mümkün.

Meclis faaliyetiniñ yasaq etilmesini Qırımtatar Qurultayınıñ Merkeziy saylav komissiyasınıñ reisi Zair Smedlâyev Facebook saifesinde izaatladı.

Qarar ilân etilgen soñ toplaşqan insanlar zalnı terk etti. Bu dava boyunca cevapkâr – Qırımtatar Milliy Meclisi reisiniñ birinci muavini Nariman Celâl Meclis azaları şikâyet arizasını berecegini ilân etti.

Aprel 26-da Qırımdaki mahkemede Meclis qapatılması boyunca davanıñ munaqaşaları keçirildi.

Aprel 25-te keçirilgen toplaşuvda mahkeme rusiyeli prokuror Natalya Poklonskayanıñ Meclis faaliyetiniñ toqtatılması boyunca qararını davağa qoştı. Poklonskaya toplaşuvda olmadı.

Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi.

Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.

Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG