Meclis faaliyetiniñ fevqulade nizamı onıñ reisi Refat Çubarov tarafından aprel 26-dan başlap, Rusiyege boysunğan Qırım Yuqarı mahkemesiniñ Meclis faaliyetiniñ yasaq etilmesi qararı qabul etilgen soñ, kirsetildi. Bu aqta Refat Çubarov Kiyevde keçirilgen brifingde bildirdi.
Onıñ qayd etkenine köre, faaliyetniñ fevqulade nizamı qırımtatarlarnıñ bütün öz-özüni idare etüv milliy organları – Qurultay, Meclis, regional meclisleri içün kirsetildi.
Bunen beraber, Refat Çubarov fevqulade nizam müddeti devamında Meclisniñ faaliyetini Meclisniñ Mahsus keñeşi idare etecegini bildirdi. Keñeş terkibine onıñ reisi, qırımtatarlarnıñ halq lideri Mustafa Cemilev (onıñ razılığınen), Ukraina territoriyasında daimiy şekilde bulunğan Meclisniñ diger azaları kirecek.
Meclis reisiniñ qayd etkenine köre, Qurultay, qırımtatarlarnıñ diger öz-özüni idare etüv milliy organlarınıñ vekâlet müddeti Meclisniñ onı toqtatmaq qararı qabul etilecegine ve yañı saylavlarğa qadar devam etecek.
Çubarov böyle qarar 2016 senesi fevral 19-da, Kreml tarafından tayinlengen Qırım prokurorı Natalya Poklonskaya tarafından Qırımda Meclis faaliyetini yasaq etmek davası açılğanı aqqında belli olğanından soñ, qabul etilgenini bildirdi.
Meclisniñ merkeziy ofisi Kiyevde yerleşecek.
Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.
Dava boyunca cevapkâr – Qırımtatar Milliy Meclisi reisiniñ birinci muavini Nariman Celâl Meclis azaları şikâyet arizasını berecegini ilân etti.
Aprel 25-te keçirilgen toplaşuvda mahkeme rusiyeli prokuror Natalya Poklonskayanıñ Meclis faaliyetiniñ toqtatılması boyunca qararını davağa qoştı. Poklonskaya toplaşuvda olmadı.
Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi.
Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.
Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
