Link açıqlığı

Siçevaya: Herson vilâyetindeki insanlarnıñ bazıları Rusiyeniñ tesirinde buluna


Herson vilâyetiniñ devlet memuriyetiniñ reis muavini Valentina Siçevayanıñ qayd etkenine köre, Herson vilâyeti sakinleri, hususan işğal etilgen Qırım ile sıñırında yerleşken köylerde yaşağanlar, Rusiye teşviqatınıñ tesirinde buluna. Bunıñ içün, Siçevaya aytqanı kibi, yerli akimiyet diqqatlı olmalı.

Böyle fikirni o Qırım.Aqiqat Radiosınıñ saba yayınında bildirdi.

«Diqqatlı olmaq kerek olğanımız şübesizdir. Biz sıñır yanındaki territoriyada bulunamız, ve çoq insanlar Rusiye teşviqatı tesirinde buluna. Bazılarnıñ ise, anda (Qırımda – QA) biznesi bar. Olar iqtisadiy qamaçavnı pek-pek begenmeyler», – dep ayttı Valentina Siçevaya.

O, aynı vaqıtta qamaçav neticesinde satma yerini coyğan iş adamlarına «vatan tarafını alıp, qarar almağa» tevsiye etti.

«Böyle vaziyet olğanda – Vatan mustaqilligi ya da yañı satma yerini qıdıruv, men bellesem, qaysı tarafnı saylamaq kerek olğanı bellidir. Ukraina mustaqilligi olmalı», – qayd etti o.

Bundan evel Herson vilâyet devlet memuriyetini Qırım qamaçavı faalleriniñ blokpostlarını regiondan yoq etmege çağırdılar. Bu aqta Herson vilâyeti Geniçesk rayonınıñ Ataman köyünde aprel 20-de keçirilgen vatandaşlarnıñ toplaşuvında oqulğan muracaatta bildirile. Çonğar köy şurasınıñ deputatı Valeriy Koblük muracaatnı oqudı. Muracaatta 180 imza qoyulğan, o Herson akimiyetine, hususan Herson vilâyeti devlet memuriyetiniñ reisi Valentina Siçevaya adına yollanğan.

2015 senesi sentâbr 20-de, Qırımğa mahsulat ve malnı alıp ketken yük naqliyeni blok etüv boyunca qırımtatarlarnıñ liderleri teşebbüsinen keçirilgen müddetsiz aktsiyası başlandı. 2016 senesi yanvar ayı ortasında, teşkilâtçılarnıñ sözlerine köre, Qırım qamaçavı boyunca aktsiyanıñ şekli deñişti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG