Link açıqlığı

Saatnıñ esas haberi

Qırımda Meclisni onıñ peyda olmasından evel cıyılğan malümatlarğa köre mahküm eteler – Smedlâyev


Qırım Yuqarı mahkemesi binası yanında
Qırım Yuqarı mahkemesi binası yanında

Rusiyege boysunğan Qırım Yuqarı mahkemesi Meclis faaliyetiniñ yasaq etilmesi boyunca davağa keçken asırnıñ 70-80-ci seneleri malümatlarını qoştı. Bu aqta aprel 25-te toplaşuvda bulunğan Qırımtatar Qurultayınıñ Merkeziy saylav komissiyasınıñ reisi Zair Smedlâyev bildirdi.

«Meclisni ekstremistik teşkilâtı olaraq tanımaq içün baqılğan meselenen bağlı ve bağlı olmağan malümatlarnı, şu cumleden 1988 senesi malümatını da qoşalar, o vaqıt Qırımtatar Milliy Meclisi yoq edi, ve, ihtimal, qabaatlayıcılar da yoq edi, ve, elbet, diger devlet – Sovet Sotsialistik Cumhuriyetleriniñ Birligi bar edi. Aynı böyle etip, Rusiye Federatsiyasınıñ uquq saasına mütenasip olmağan areketler ve vesiqalarnı baqmağa tırışalar», – dep yazdı o Facebook saifesinde.

Şimdiki vaqıtta mahkemede davanıñ ekinci tomını baqmağa başladılar. Mahkemeciler Meclis saytını, onıñ beyannamesini ve internet ağında haber beyanatlarınıñ Screenshotlarını ögrendi.

Bundan da ğayrı, mahkemede Meclis reisi Refat Çubarovnıñ Facebook saifesiniñ Screenshotını taqdim ettiler, o yerde Meclis azalarınıñ sayısı 33 insandan ibaret olğanı bildirile.

Toplaşuvda Moskvağa boysunğan yarımada ükümetiniñ Milletlerara munasebetler ve sürgün etilgen vatandaşlarnıñ meseleleri boyunca Devlet komitetiniñ temsilcisi endi buluna.

Aprel 25-te keçirilgen toplaşuvda mahkeme rusiyeli prokuror Natalya Poklonskayanıñ Meclis faaliyetiniñ toqtatılması boyunca qararını davağa qoştı.

Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi. Aprel 15-te Qırımda Meclisni yasaq etmesi davası boyunca nevbetteki mahkeme toplaşuvı keçirildi, nevbetteki toplaşuvnı aprel 25-te keçirmek qararı alındı.

Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.

Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG