Rusiye tarafından işğal etilgen Qırımnıñ azat etilmesi bir qaç faktornıñ bulunması şartı ile olması mümkün, olarnıñ arasında arbiy faktor eñ müim degildir. Böyle fikirni Qırımtatar Milliy Meclisniñ reisi Refat Çubarov bildirdi.
«Men Qırımnıñ arbiy yolnen azat etilmesiniñ tarafdarı olmağan insanlardan biri olam. Bu bir qaç emiyetli faktornıñ – siyasiy, iqtisadiy, diplomatik ve arbiy faktornıñ birlikte olması kerek. Amma Qırımnıñ tek arbiy yolnen azat etilmesi mümkün degil», – dep añlattı o «Apostrof» neşriyatına bergen intervyusında.
Refat Çubarovnıñ añlatqanına köre, böyle yol yarımadada yaşağan insanlarğa «çoq felâket» ketire bile, çünki «bu territoriyada Rusiye ordusınıñ olar içün qıymeti olmağan insanlarğa qarşı yapqan areketleri daa yaramay olacaqtır». «Eger olar öz territoriyasında, Qavqazda, yer yüzünden köylerni tolusınen yoq etken olsa ediler, soñ Qırımda neler yapacaqlarını tek tasavur ete bilem», – dep ayttı Meclis reisi.
Böyle etip, o teşkil ete bilecek «Qırım» batalyonı Qırımnıñ arbiy yolnen azat etmek içün qullanılacaqmı sualine cevap berdi.
Qırımtatar halqınıñ lideri Mustafa Cemilevniñ bildirgenine köre, Herson vilâyetinde işğal etilgen Qırım ile memuriy sıñırda qırımtatarlarnıñ iştiragi ile batalyonnıñ teşkil etilmesi devam ete.
Rusiyege boysunğan yarımada prokuraturası batalyon teşkil etilmesi boyunca azırlıq taqiqatını başladı, bu aqta qırımtatarlarnıñ liderleri ilân etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
