Link açıqlığı

Saatnıñ esas haberi

Adliyeci: şimdilik Qırımtatar Milliy Meclisi faaliyetinde iştirak etüv içün para cezası közde tutıla


«Memorial» uquq qoruyıcı merkeziniñ uquqçısı Tatyana Gluşkova Rusiye Adliye nazirligi tarafından qarar qabul etilgen soñ Qırımtatar Milliy Meclis faaliyetini teşkil etüv ve iştirak etüv içün nasıl ceza ola bilecegini añlattı. Onıñ aytqanlarına köre, şimdiki vaqıtta Meclis faaliyetinde iştirak etkenler cinaiy mesüliyetke degil de, memuriy mesüliyetke celp etile bile, yani yaqalanma degil de, para cezası ola bile.

Bu aqta o Qırım.Aqiqat Radiosınıñ yayınında bildirdi.

«Teşkilâtnı (Qırımtatar Milliy Meclis – QA) ekstremistik teşkilâtlar cedveline degil de, ekstremistik faaliyetnen bağlı olğanı içün faaliyeti toqtatılğan teşkilâtlar cedveline kirsetildi - bu ise eki farqlı cedveldir. Yani, faaliyeti yasaq etilgen teşkilâtlar cedveli degil de, faaliyeti toqtatılğan teşkilâtlar cedvelidir. Şimdiki vaqıtta Meclis faaliyetini teşkil etüv ya da onıñ faaliyetinde iştirak etüv içün insanlar teşkilatçı olaraq bir-eki biñ ruble qadar, iştirakçi olaraq 500 rubleden bir biñ ruble qadar para cezasınen cezalana bile», – qayd etti Gluşkova.

Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.

Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi. Aprel 15-te Qırımda Meclisni yasaq etmesi davası boyunca nevbetteki mahkeme toplaşuvı keçirildi, nevbetteki toplaşuvnı aprel 25-te keçirmek qararı alındı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG