Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti. Bunı «İnterfaks» bildire.
Böyle etip o, Rusiye Adliye nazirliginiñ Meclis faaliyetini «ekstremistik» olaraq tanıma qararını ve onı yasaq etmesini toqtatmaq Amerika Qoşma Ştatları Devlet departamentiniñ Rusiyege çağıruvına izaat berdi.
«Bu mesele Rusiye qanunlarına köre baqıla, bunıñ içün bu vaziyette diger devletlerniñ fikirlerini diñlemek imkânsız ve kereksiz dep sayamız», – ayttı Peskov cuma künü jurnalistlerge.
«Bu Rusiye Federatsiyasınıñ içki işi», – qoştı Peskov.
Amerika Qoşma Ştatlarınıñ Devlet departamenti Rusiyeni Qırımtatar Milliy Meclisni «ekstremistik teşkilâtı» olaraq tanımaq qararını ve Qırım akimiyetiniñ bu demokratik müessiseniñ faaliyetini toqtatmaq qararını lâğu etmege çağırdı.
Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.
Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi. Aprel 15-te Qırımda Meclisni yasaq etmesi davası boyunca nevbetteki mahkeme toplaşuvı keçirildi, nevbetteki toplaşuvnı aprel 25-te keçirmek qararı alındı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
