Brüssel ve Washingtonda bu sene küzde Qırımtatar Milliy Meclisiniñ temsilcilikleri açıla bile. Bu meseleniñ maliye ve kadrlar tarafları çezilip başladı.
Bu aqta Qırım.Aqiqat Radiosınıñ saba yayınında Qırımtatar Milliy Meclisiniñ reisi Refat Çubarov bildirdi.
«Bu eki sene devamında, Qırım Rusiye tarafından işğal etilgen soñ, faaliyetimizniñ esas meydanları esas halqara teşkilatlar, olarnıñ ştab-kvartiraları yerleşken bazı devletlerniñ paytahtlarında, hususan Brüsselde buluna. Bellesem, yañı siyasiy mevsim açılmasınen, yani 2016 senesi küzni köz ögünde tutam, biz Brüsselde temsilciligimizni açıp olurmız. Kadrlar ve maliye meselelerini çezemiz. Aynı vaziyet Washingtonda», – dep ayttı Çubarov.
Meclis reisiniñ qayd etkenine köre, qırımtatarlarnıñ temsilci organnıñ temsilciliklerniñ iç gizli siyasiy sebepleri olmaycaq.
«Bu Qırımtatar Milliy Meclisiniñ iş aletleridir, bu siyasiy temsilcilik degil. Bu meydançıqlarda halqara teşkilâtlarnen beraber er künlik yapılğan iş ömürge keçirilecek», – qayd etti Çubarov.
Aprel 13-te Rusiyege boysunğan Qırım prokurorı Natalya Poklonskaya yarımadada Qırımtatar Milliy Meclisiniñ yarımadada faaliyetini toqtatmaq qararını alğanını bildirdi. Onıñ aytqanına köre, Meclis şeer ve belediye kütleviy haber vastalarından faydalanamaz, er angi kütleviy tedbirni keçiremez, bank ödemelerini qullanamaz ve asılında iç bir işnen oğraşamaz.
Bundan evel Natalya Poklonskaya Rusiyege boysunğan Qırım Yuqarı mahkemesine muracaat etip, Meclis faaliyetini yasaq etmege talap etti. Mart başında işbu dava boyunca mahkeme esnası başlandı. Mahkeme taqiqatı devam etmekte.
Meclis reberleri mahkeme prokuraturanıñ talaplarını yerine ketirecek, dep tahmin ete. Ukraina Baş prokuraturası Meclisniñ qanunsız yasaq etilmesi boyunca cinaiy iş açılğanını bildirdi.
Ukraina Tışqı işler nazirligi Meclis faaliyetini yasaq etecek olğan Rusiye akimiyetiniñ areketlerine qarşı narazılıq bildirdi. Birleşken Milletler Teşkilâtı Rusiye Federatsiyasını Qırımda Qırımtatar Milliy Meclisiniñ yasaq etilmesine yol bermemege çağırdı. Avropa birligi de Meclis faaliyetini yasaq etmek niyetlerinden qasevetlengenini bildirdi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
