Link açıqlığı

Qırım mahkemesi Ahtem Çiygoznı mayıs 5-ke qadar apiste qaldırdı - adliyeci


Ahtem Çiygoz mahkemede, arhiv fotoresimi

Moskvağa boysunğan Aqmescitteki rayon mahkemesi Qırımtatar Milliy Meclis reis muavini Ahtem Çiygoznı «fevral 26 işi» boyunca mayıs 5-ke qadar apiste qaldırdı. Bu aqta onıñ advokatı Nikolay Polozov Facebook saifesinde bildirdi. Onıñ sözlerine binaen, mayıs 5-te bu iş boyunca taqiqat müddeti bite.

«İhtimal, bu kelecek afta, mayıs bayramlarından evel, daa bir mahkeme toplaşuvı keçirilecegini ve Ahtem Çiygoznıñ apiste bulunmasınıñ müddeti uzatılacağını bildirde», – dep qayd etti Nikolay Polozov.

Bunen beraber o, taqiqatçı Ahtem Çiygoznıñ apiste bulunmasınıñ müddetini mayıs 22-ge qadar uzatmağa teklif etkenini bildirdi. «Meraqlı bir şey. Müddetniñ uzatılmasınıñ sebeplerinden biri olaraq mahkemeci bunı ayttı, tsitata ketirem: «Çiygoz A.Z.

«Qırımtatar Milliy Meclisi» liderleri Çubarov R. ve Cemilev M. ile bağ tuta, olar Ukraina territoriyasında bulunıp, Qırım Cumhuriyetinde siyasiy vaziyetni kerginleştirmek içün Rusiyege qarşı faaliyet alıp baralar». Qoşulacaq bir şey qalmadı», – yazdı adliyeci.

Aprel 15-te adliyeci Ahtem Çiygozğa qarşı onı «fevral 26 işi» boyunca zorbalıq ve mülkiyetni bozuv ile yapılğan kütleviy nizamsızlıqta qabaatlı olaraq mesüliyetke celp etmek içün qarar alınğanını bildirdi.

Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.

Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. 2016 senesi fevral ayında rusiyeli Qırım Yuqarı mahkemesiniñ toplaşuvında bu işni tekrar taqiq etilmesine yollamağa qarar alındı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG