Qırım ve Aqyar meseleleri boyunca Ukraina Devlet hızmetınıñ reis muavini Zarema Özenbaşnıñ fikirince, Şimaliy-Qırım kanalından suv yarımadağa Rusiyeniñ nezareti astında bulunğan vaqıtta keçmemek kerek.
Bu aqta o Qırım.Aqiqat Radiosınıñ yayınında bildirdi.
«Biz, Ukraina devleti, işğalci akimiyetiniñ ögünde çıqqan meselelerni çezmemek kerekmiz. Hususan bunıñ içün biz kanalnı qapattıq, ve ümüt etem ki, Şimaliy-Qırım kanalına suv keçmeycektir. Ümüt etem ki, (Herson vilâyetinde – QA) bentniñ qurulması bitirilecek. O endi quruldı, bazı şeylerni bitirmege qaldı. Ve o Herson vilâyetinde, Kalançakta toplaşacaq bütün suv aqımına dayanacaq. Ve suv, kerçekten de, keçmeycek», – dep ayttı o.
Muvaqqat bent Şimaliy-Qırım kanalınıñ yatağında eki yıl evel, Qırımğa kanal vastası ile suv keçmege toqtağan soñ quruldı. Onı Herson vilâyetindeki tarlalarnı suvarmaq içün suvnıñ kerekli seviyesini tutmaq içün qurdılar.
Bundan evel Herson vilâyeti işğal etilgen Qırım territoriyasına Herson vilâyetinden suv keçirgen Şimaliy-Qırım kanalında mahsus mandalnı qurmaq içün devlet bücetinden 50 million grivna alacağı aqqında bildirilgen edi.
Ukrainanıñ qıtalı territoriyasından Dneprden Şimaliy-Qırım kanalına keçken suv Qırımnıñ suvğa ihtiyaclarınıñ 85 %-nı qapata edi. Bu suv köy hocalığı içün qullanılğan edi. Qırım Rusiye tarafından işğal etilgen soñ kanal vastası ile suv keçirilmesi toqtatıldı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
