Link açıqlığı

Kiyevde keçirilgen «Kitap arsenalı» festivali çerçivesinde «Mustafa Cemilev. Azatlıq içün sınmağan küreşçi» adlı fotosergi taqdim etildi. Müellifler qırımtatarlar lideriniñ ömür tarihını yazılğan tefsirler ile fotolar vastası ile kösterdi, bunı Qırım.Aqiqat mühbiri bildire.

«Bu sergi pek müimdir, o insan barışıq yolu ile tek qırımtatarlarnıñ degil de, insanlarnıñ aqları içün küreşkenini añlata. Bu yerde, aytması mümkün ki, ilk künlerden Mustafa ağağa Lehistan Cumhuriyeti Tış işler nazirliginde Birdemlik mukâfatını taqdim etkenimizge qadar bütün qıyın tarihını körmek mümkün. Bellesem, bu bizim qırımtatar halqı ile birdemligimizniñ kiçik isse oldı, ve Mustafa ağanıñ faaliyeti içün minnetdarlıqtır», – dep qayd etti sergi taqdiminde Kiyevdeki Lehistan institutınıñ müdiresi, Ukrainada Lehistan elçiliginiñ mesleatçı-elçisi Yeva Figel.

«Bu mukâfatnı tesis etkenimizde, onı birinci olaraq Ukrainadan kimse almaq kerek olğanını añladıq, ve çoq tüşünmedik, Birdemlik mukâfatını sovet vaqtından berli serbestlik içün küreş alıp barğan qaramanğa, o vaqıt Ukraina da duyğan basqınğa qarşılıq köstergen insannıñ timsali olğan Mustafa Cemilevge teslim etmege qarar aldıq. Bu Ukrainağa, qırımtatarlarğa köstergen destegimizniñ timsalidir», – dep ayttı Lehistan Cumhuriyetiniñ vekâletli elçisi Genik Litvin.

Onıñ hatırlatqanına köre,«bu Qırımnıñ ukrain devletine qaytarılması, qırımtatarlar aq-uquqlarını bütünley qullanmaları içün daima yapılacaq işniñ tek kiçik parçasıdır».

«Kitap arsenalı» adlı altıncı halqara festival Kiyevde aprel 20-24 künleri «Mistetskiy arsenal»da keçirile. Bu sene teşkilâtçılar «Qırım» adlı mahsus programmanı azırladı. Programma ziyaretçilerni qırımtatarlarnıñ medeniy ayatı ile tanış etecek. Leyha çerçivesinde Qırım ve qırımtatarlar aqqında kitaplar taqdim etilecek, qırımtatar tilinde bastırılğan neşirlerniñ sergisi, foto sergileri açılacaq, filmler kösterilecek.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG