Herson vilâyet devlet memuriyetini Qırım qamaçavı faalleriniñ blokpostlarını regiondan yoq etmege çağırdılar. Bu aqta Herson vilâyeti Geniçesk rayonınıñ Ataman köyünde aprel 20-de keçirilgen vatandaşlarnıñ toplaşuvında oqulğan muracaatta bildirile.
Çonğar köy şurasınıñ deputatı Valeriy Koblük muracaatnı oqudı. Muracaatta 180 imza qoyulğan, o Herson vilâyeti devlet memuriyetiniñ reisi Valentina Seçevaya adına yollanğan.
«Meselemiz Çonğar köy şurası territoriyasında Qırım qamaçavı iştirakçileriniñ bulunması ile bağlı. Qamaçav iştirakçileri Çonğar köyü yanında, öz blokpostı yanında yerleşken ilk künlerinden ealini horlamağa başladı. Avtonaqliyat yolcularınıñ yüküni teşkermek içün iç aqları olmadan, maşinalarnı toqtatıp olarnıñ eşyalarını teşkerip çıqa ediler. Vesiqalarnı, kene de aqları olmadan, talap ete ediler, bundan Qırımğa ketken bizim vatandaşlarımız qıynalğan edi», – dep aytıla muracaatta.
Bundan da ğayrı, vesiqada «Çonğar» Kiriş-çıqış nezaret noqtası yanında yerleştirilgen «Qırımtatar muhtar cumhuriyeti» yazısı ile işaret boyunca qasevet çekilgeni aqqında bildirile.
«Yazıq ki, memuriyetimiz, uquq qoruyıcı organlar bu işaretni körmeyler. Birinciden, bu işaretniñ artında daa Ukrainanıñ qıtalı territoriyası bar, ekinciden, Qırımda, qırımtatarlardan ğayrı, ukrainler de yaşay, olar daa çoqlar. Ne içün azlıq çoqluqqa istegenini yaptıra? Üçünciden, böyle işaret, fikirimizce, Ukraina topraq bütünligini qast ete. Bu kibi cumhuriyet separatsistlerniñ DHC ve LHC-den iç farqlanmay», – dep qayd etti Koblük.
«Biz öz ukrain toprağımızda yaşamağa isteymiz, biz kimseniñ bizge istegenini yaptırğanını ve bizni horlağanını istemeymiz. Sizni qan tökülmesini qaçırmaq içün, blokpostnıñ keçirilmesi, analar balalarnı mektepke yibermege qorqqanları içün sebep olğan köy şurasınıñ territoriyasında silâlı insanlarnıñ bulunması meselesini çezmege çağıramız», – qoştı o.
Sakinlerniñ toplaşuvını Geniçesk rayon devlet memuriyetiniñ yolbaşçı muavinleri, uquq qoruyıcı organları ve yerli qırımtatar meclisleriniñ temsilcileri ziyaret etti.
2015 senesi sentâbr 20-de, Qırımğa mahsulat ve malnı alıp ketken yük naqliyeni blok etüv boyunca qırımtatarlarnıñ liderleri teşebbüsinen keçirilgen müddetsiz aktsiyası başlandı. 2016 senesi yanvar ayı ortasında, teşkilâtçılarnıñ sözlerine köre, Qırım qamaçavı boyunca aktsiyanıñ şekli deñişti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
