Link açıqlığı

Kiyevde «Kitap arsenalı» altıncı halqara festivali açıldı. Bu sene teşkilâtçılar «Qırım» adlı mahsus programmanı azırladı. Programma ziyaretçilerni qırımtatarlarnıñ medeniy ayatı ile tanış etecek. Bunı Qırım.Aqiqat mühbiri bildire.

«Bu platformanı planlaştırğanımızda taqdim etilecek Qırım aqqında tek eki kitapnı bile edik. Amma öyle oldı ki, şimdi elimizde Qırım aqqında on dane yanılıq prezentatsiyası bar. Bu em Qırım işğali, em qırımtatar toyu, em de Qırım tarihı aqqında işlerdir. Bundan da ğayrı, Qırım aqqında «Alim» adlı film de bar, onı İzmaylovnıñ nağmeleri refaqatında kösterecekmiz», – dep añlattı Kitap Arsenalınıñ idarecisi Oksana Hmelevskaya.

Teşkilâtçılar festivalde Qırımda qırımtatar tilinde neşirler bastırğan yekâne neşriyatlarnıñ biri iştirak etecegini ayrıca qayd eteler.

«Ğaliba, eñ ağır şeylerden biri bizge qırımtatar neşirniñ kelmesi oldı, soñ vaqıtqa qadar bu vaqia aqqında bildirmey edik, çünki sıñırdan keçmesi nasıl olacağını bilmey edik», – dep qayd etti «Qırım» adlı mahsus programmanıñ idarecisi Yelena Brayçenko.

Teşkilatçılarnıñ bildirgenlerine köre, «Qırım» adlı mahsus programmanı azırlağanları içün çoq yahşı izaatlar ve teşekkür sözlerini aldılar, bu ise, olarnıñ fikirince, ukrain ve halqara auditoriyanıñ qırımtatar tarihı ve medeniyetine merağı artqanını köstere.

«Qırım» platforması «Kitap arsenalı» festivaliniñ bütün künleri devamında çalışacaq. Leyha çerçivesinde Qırım ve qırımtatarlar aqqında kitaplar taqdim etilecek, qırımtatar tilinde bastırılğan neşirlerniñ sergisi, foto sergileri açılacaq, filmler kösterilecek, bu yerde elnen yapılğan qırımtatar milliy urbalarını, milliy örneklernen çölmekçilik eserlerini satın almaq mümkün.

«Kitap arsenalı» festivali Kiyevde aprel 20-24 künleri «Mistetskiy arsenal»da keçirile.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG