Link açıqlığı

Ukraina parlamentiniñ reisi Andriy Parubiy Rusiye Adalet nazirliginiñ Qırımtatar Milliy Meclisini ekstremist teşkilât olaraq ilân etmek qararını «Rusiye faşizminiñ ifadesi» dep adladı.

«Tünevin Rusiye Adalet nazirligi Qırımtatar Milliy Meclisiniñ ekstremist teşkilât olğanını ilân etti. Diktatorlar Stalin ve Gitler devri bitken soñ ilk sefer bütün halqnı ekstremist olaraq ilân eteler. Ve bu Rusiye faşizminiñ ifadesidir», – dep yazdı o aprel 19-da öz Facebook saifesinde.

«Ukrain parlamenti adından halqara teşkilâtlarğa muracaat etem – bu cinayetke lâyıq bir cevap beriñiz. Ukraina Tış işler nazirligine Birleşken milletler teşkilâtınıñ Havfsızlıq şurasınıñ bu mesele boyunca acele toplaşuvını keçirmek imkânını baqmaq muracaat ile bulunam», – qoştı Parubiy.

Aprel 18-de, bazarertesi künü, Rusiye Adalet nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Nazirlik saytında qayd etilgenine köre, bu qarar «Qırım cumhuriyeti prokurorınıñ cemaat birleşmesi faaliyetiniñ toqtatılması aqqında qararı boyunca» qabul etildi.

Ukraina Tış işler nazirliginde bu qararnı «insan aqlarını büyük bozuvı» ve Qırımnıñ tamır halqına qarşı Stalin repressiyalarınıñ devamı dep adlandırdı.

Aprel 3-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi.

Bundan evel Birleşken milletler teşkilâtı Rusiye Federatsiyasını Qırımda qırımtatar halqı Meclisiniñ qapatmasına yol bermemege çağırdı. Avropa Birligi Meclisni qapatmaq niyetlerden raatsız olğanını bildirdi.

Aprel 15-te, cuma künü, Qırımda Meclisni yasaq etmesi davası boyunca nevbetteki mahkeme toplaşuvı keçirildi, nevbetteki toplaşuvnı aprel 25-te keçirmek qararı alındı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG