Qırımnıñ Rusiye akimiyetine boysunğan «Krıminform» saytı Rusiye uquq qoruyıcıları yedi evde tintüv keçirgenlerini bildire.
«Aqmescitte beş adres boyunca, Yaltada – bir, ve bir adres boyunca Aqyarda tintüv keçirile», – dep yaza neşir.
«Qırım.Aqiqat mühbirine qarşı açılğan ekstremizm cinaiy işiniñ taqiqatı çerçivesinde Qırım ve Aqyarda birden yedi evde tintüv keçirile», – dep yaza neşir.
Qırımnıñ Rusiye prokuraturasınıñ matbuat hızmeti bildirdi ki, Aqmescit ve Yaltada jurnalistlerniñ bilgisayarları ve donatmaları tutıp alına.
Mustaqil matbuat vastalarınıñ buña dair malümatı yoq.
Aprel 19-da saba Rusiyege boysunğan Qırım prokurorı Natalya Poklonskaya Qırım jurnalistine qarşı kütleviy haber vastalarında bastırğan maqalesi içün Rusiye qanunlarınıñ «separatizm» maddesi boyunca cinaiy iş açılğanını bildirdi. Poklonskaya jurnalistniñ adı ve soyadını aytmadı. Aynı vaqıtta jurnalist Oleg Krüçkov Mıkola Semena aqqında laf ketkenini bildirdi.
Adliyeci Emil Kürbedinov Qırımda daa eki jurnalistniñ evinde tintüv keçirilgenini ve olarnı yaqalağanlarını aydınlattı.
Mıkola Semena – Qırım jurnalisti, eskiden «Den» ve «Zerkalo nedeli» umumukrain neşirlerinde çalışqan edi, Moskvanıñ «İzvestiya» neşiriniñ sabıq mühbiridir. Al-azırda nefaqalı.
Ukraina mustaqil media iş birligi yolbaşçısı Yuriy Lukanov aprel 19-da Qırım jurnalistleriniñ evlerinde keçirilgen tintüvlerni serbest matbuatqa basqı dep adladı. Onıñ bildirgenine köre, ÜMMİB halqara teşkilâtlardan vaziyetke tesir etmege rica etecek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
