Moskva adliyecisi Dmitriy Sotnikovnıñ fikirince, Rusiye Adalet nazirligi Qırımtatar Milliy Meclisini ekstremist teşkilâtlar cedveline kirsetken soñ Meclis azaları «ekstremist cemiyetinde» iştirak etkeninden ceza taqibine oğray bileler. Bunı Sotnikov Qırım.Aqiqatqa ayttı.
Onıñ qayd etkenine köre, Rusiye Ceza kodeksiniñ 282-nci maddesi ekstremist cemiyetni ya da teşkilâtnı quruv, iştirak etüv, em de onı maliye etüv içün taqip etmege imkân bere.
«Añlağanıma köre, teşkilât ekstremist tanılsa, onıñ belli bir azaları bar edi, onı baqqan insanlarnı 282-nci maddege köre cinaiy mesülietke çekecekler. Birinci bölügi (281.1) cemiyetni quruv, celp etüv, iştirak etüvni qaplap ala, 282.2 aynısını, amma teşkilât içün, 282.3 – maddiy meselelerni qayd ete. Meclisniñ 282.2 ve 282.3 maddeleri olacaqtır», – dedi adliyeci.
Dmitriy Sotnikov qayd etti ki, bu maddeniñ cezası yüz biñ ruble «ya da bir yıllıq aylıq ya da diger kâr miqdarı» ola bile ve atta dört yılğa qadar azatlıqtan marum qaldıruv kibi ceza berile bile.
Bazarertesi künü, aprel 18-de, Adalet nazirligi Qırımtatar Milliy Meclisini ekstremist faaliyetinden sebep yasaq etilgen teşkilâtlar cedveline kirsetti. Bu qarar aprel 18-de Adalet nazirligi tarafından «Qırım Cumhuriyeti prokurorınıñ cemaat teşkilâtınıñ faaliyetini toqtatmaq qararı esasında» qabul etildi.
Ukraina Tışqı işler nazirligi bu qararğa «insan aqlarınıñ sert bozulması» ve Qırımnıñ tamır halqına qarşı Stalin repressiyalarınıñ devam dep ayttı.
Aprel 13-te Kreml tayin etken Qırım prokurorı Natalya Poklonskaya bildirdi ki, Qırımtatar Milliy Meclisiniñ faaliyeti yarımadada mahkeme qararı olmadan yasaq etile.
Ukraina Tış işler nazirligi Rusiye akimiyetiniñ Meclis faaliyetini yasaq etmek içün yapqan areketlerine narazılıq bildirdi. Birleşken Milletler Teşkilâtı Rusiye Federatsiyasını Qırımda Qırımtatar Milliy Meclisiniñ yasaq etilmesine yol bermemege çağırdı. Avropa Birligi Meclis faaliyetini yasaq etmek niyetlerinden qasevetlengenini bildirdi.
Cuma künü, aprel 15-te, Qırımda Meclis yasaqlanması mahkemesi olıp keçti, nevbetteki toplaşuvnıñ keçirilmesi aprel 25 kününe belgilendi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
