Aqmescitte aprel 15-te Rusiyege boysunğan Qırım Yüksek mahkemesinde işğal etilgen Qırımnıñ Rusiye prokuraturası açtırğan Qırımtatar Milliy Meclisi faaliyetiniñ yasaqlanması davası boyunca toplaşuv başlandı.
«Argumentı nedeli Krım» bildirgenine köre, toplaşuv yarım saatke keç qalıp başlandı.
«Bugünki mahkemede esnasnıñ esas şahısları – Meclisni temsil etken Nariman Celâl ve Natalya Poklonskaya (Qırımnıñ Rusiye prokurorı – QA) yoq», – dep bildire neşir.
Qayd etilgeni kibi, havfsızlıq hızmetiniñ hadimleri bu sefer «kelgenlerni o qadar teşkermeyler», bina yanında nevbetçilik yapqan uquq qoruyıcılar da o qadar çoq degil.
Bu dava boyunca soñki mahkeme aprel 8-de olıp keçti. Kreml kontrol etken yarımada prokuraturası, onıñ fikirince, Meclis reisi Refat Çubarovnıñ Rusiye Federatsiyası topraq bütünligini bozacaq «ekstremistik çağıruvlarını» isbatlağan delillerni berdi.
Mahkeme Meclis vekilleriniñ malümatını ögrene bilmek içün vaqıt bermek muracaatını qabul etti. Nevbetteki toplaşuv aprel 15 kününe belgilendi.
Cumaaqşamı künü, aprel 7-de, mahkemede davacı, davalı ve celp etilgen taraflar – Qırım Adalet nazirligi ve yerli Milletlerara munasebetler komitetiniñ adliyecisi çıqışta bulundılar.
Meclisni temsil etken adliyeci Cemil Temişev mahkeme qararı yarın çıqarıla bile, dep ayta.
Esnas Qırımnıñ Rusiye prokurorı Natalya Poklonskayanıñ teşebbüsi ile başladı. Meclis reberleri prokuraturanıñ talapları yerine ketirilecegini tüşüneler.
Ukraina Tışqı işler nazirligi Meclis faaliyetini yasaq etecek olğan Rusiye akimiyetiniñ areketlerine qarşı narazılıq bildirdi. Birleşken Milletler Teşkilâtı Rusiye Federatsiyasını Qırımda Qırımtatar Milliy Meclisiniñ yasaq etilmesine yol bermemege çağırdı. Avropa birligi de Meclis faaliyetini yasaq etmek niyetlerinden qasevetlengenini bildirdi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
