Ukraina prezidentiniñ qırımtatar halqı işlerinden vekâletlisi Mustafa Cemilevniñ faaliyetini teminlev bölüginiñ müdiri Yusuf Kürkçiniñ fikirince, Rusiyege boysunğan Qırım akimiyeti ekstremizm ve Qırımtatar Milliy Meclisinen «küreşini» qullanıp, devletniñ diger saalarında öz muvafaqiyetsizligini gizleycek ola.
Bunı o aprel 14-te Kyivdeki matbuat konferentsiyasında ayttı, dep haber ete Qırım.Aqiqat.
«Eali faqır, iqtisadiy saada zeval, olar (Qırımnıñ Rusiye akimiyeti – QA) iqtisadiyat saasında rutbe alıp olamaylar, narazılıq meydanlarında inşaatlarnıñ yıqtırılması ve Meclis yasaqlanması aqqında qarar alına, olarnıñ muvafaqiyetsizligini aqlaycaq ekstremizm ve Meclis ile küreşini qullanacaq olalar. Böyle olacağını bile ve bekley edik», – dedi o.
Çarşenbe künü, aprel 13-te, Moskva tayin etken Qırım prokurorı Natalya Poklonskaya yarımadada Qırımtatar Milliy Meclisiniñ faaliyeti aqqında mahkeme qararı olmasa da, Meclis çalışmaycaq, dep bildirdi. Meclis adliyecileri bu qarardan şikâyet eteceklerini bildirdiler.
Ukraina prezidenti Petro Poroşenko Meclis faaliyetiniñ toqtatılması qararından sebep dünya toplulığına muracaat etti. Ukraina devlet yolbaşçısınıñ aytqanına köre, «bu cinayetni» toqtatacaq tek bir yol bar – yarımadanıñ işğalden azat etilmesi.
Meclis reisi Refat Çubarovnıñ qayd etkenine köre, «Kremlniñ emri» ile qabul etilgen Poklonskayanıñ qararı oña qarşı qabaat, şu cümleden devlet hainliginiñ temeli olacaq.
2015 senesi fevral ayında Natalya Poklonskaya Rusiyege boysunğan Qırım Yuqarı mahkemesine muracaat etip, Meclis faaliyetini yasaq etmege talap etti. Mart başında işbu dava boyunca mahkeme esnası başlandı. Nevbetteki mahkemeniñ keçirilmesi aprel 15 kününe planlaştırıla.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
