Link açıqlığı

Litvaniya prezidenti Qırımda insan aqlarınıñ bozulmasını qırımtatarlarnıñ liderlerinen muzakere etti


Litvaniya Cumhuriyetiniñ prezidenti Dalâ Gribauskayte Vilniuasta qırımtatarlarnıñ liderleri Mustafa Cemilev ve Refat Çubarovnen körüşip, Rusiyeniñ Qırım işğalinden soñ yarımadada qırımtatarlarnıñ vaziyetini ve demokratik serbestlikniñ bozulmasını muzakere etti.

Bunı Ukraina prezidentiniñ qırımtatar halqı işlerinden vekâletlisi Mustafa Cemilevniñ matbuat hızmeti bildire.

Dalâ Gribauskayteniñ aytqanına köre, Litvaniya «Qırımnıñ qanunsız işğali ve Rusiyege qoşulmasını sert bir şekilde takbih ete».

«Litvaniya Qırımnıñ qanunsız işğali ve Rusiyege qoşulmasını sert bir şekilde takbih ete. Al-azırda zor bir problemlernen qarşılaşqan qırımtatarlar ve Ukrainanıñ bütün sakinlerine qoltutamız. Rusiyege qarşı cezalar boyunca ardı-sıra adımlarğa qoşulamız, Minsk añlaşmalarına bütünley riayet etilgenine qadar ve Qırım işğalden azat etilgenine qadar cezalar lâğu etilmemeli», – dep ayttı Dalâ Gribauskayte.

Litvaniya prezidentiniñ bildirgenine köre, Qırımnıñ silânen teminlenmesi de telükeli bir şey. Onıñ zanınca, yarımada Rusiye arbiy alanına çevirildi. Onıñ malümatına köre, Rusiye Qırımnı işğal etken soñ yarımadada 24,5 biñ arbiy ve aman-aman bütün Qara deñiz regionını qaplap alğan silâ bar.

Dalâ Gribauskayteniñ fikirince, Qırım «fitne merkezi ve regiondaki ateş noqtasına çevirile bile».

Vilniusta aprel 11-13 künleri Dünya qırımtatar kongressi İdare şurasınıñ toplaşuvı keçirilmekte. Tedbir «İşğal etilgen Qırımda insan aqlarınıñ bozuluvı» halqara konferentsiyasından başlandı. Konferentsiya devamında Rusiyeniñ Qırım işğali ve yarımadada qırımtatarlarnıñ vaziyetine dair bir qaç muracaat ve beyanname seslendirildi.

Rusiye akimiyeti işğal etilgen Qırımda insan aqları bozulğanını red ete.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG