Rusiye Qırımnı işğal etken soñ yarımadada «qırımtatarlarnıñ Vatanlarında raat yaşayışı bozuldı», dep ayttı Litvaniya parlamentiniñ spikeri Loreta Graujinene. O, aprel 11-de Vilniusta (Litvaniya) keçirilgen Dünya qırımtatar kongressi İdare şurasınıñ toplaşuvında çıqışta bulundı.
Bunı Ukraina prezidentiniñ qırımtatar halqı işlerinden vekâletlisi Mustafa Cemilevniñ matbuat hızmeti Facebookta bildire.
Berilgen malümatqa köre, Loreta Graujinene «İşğal etilgen Qırımda insan aqlarınıñ bozuluvı» halqara konferentsiyasınıñ iştirakçilerini ve Dünya qırımtatar kongressi İdare şurasınıñ toplaşuvı iştirakçilerini tebrikledi.
«Rusiye Federatsiyası Qırımnı işğal etken ve qanunsız şekilde öz terbine qoşqan soñ qırımtatarlarnıñ Vatanlarında raat yaşayışı bozuldı. İşğalden soñ Qırım Muhtar Cumhuriyetinde insan aqları bozulğanına ve insanlarğa basqı yapılğanına yazıqsınamız», – dep qayd etti o.
Loreta Graujinene Litvaniya parlamentinde keçirileyatqan konferentsiya «insanlarnı Qırımda üküm sürgen qanunsızlıqtan haberdar etecegine» ümüt beslegenini aydınlattı.
Vilniusta aprel 11-13 künleri Dünya qırımtatar kongressi İdare şurasınıñ toplaşuvı keçirilmekte. Konferentsiya Litvaniya parlamentiniñ reisi Loretta Graujinene reberligi altında Litvaniya parlamenti binasında azırlandı. Tedbir «İşğal etilgen Qırımda insan aqlarınıñ bozuluvı» halqara konferentsiyasından başlaycaq.
2016 senesi fevral ayında Avropa parlamenti Rusiye işğal etken Qırımda qırımlılar, hususan, qırımtatarlarnıñ aq-uquqlarınıñ bozulmasını takbih etip, bunıñnen bağlı rezolütsiyanı qabul etti. Dünya qırımtatar kongressiniñ eyyetleri Litvaniya reberligi ile körüşecekler. İdare şura toplaşuvında Qırım, Türkiye, Romaniya, Poloniya, Kanada, Amerika Qoşma Ştatlarından tahminen 70 teşkilât temsilcisi iştirak etecektir.
Qırımnıñ Rusiye akimiyeti yarımadada insan aqları bozulmağanını bildire. Qırımtatar resurs merkezi mart ayı devamında Qırımda aq ve serbestlik bozulmasını 68 kere qayd etti. Merkez Qırımda insan aqlarınıñ bozulması artqanını bildire. Fevral malümatına binaen, 40 bozuv qayd etilgen edi.
Tintüv, yaqalav, qorquzuv, çeşit türlü yasaqlar Qırımda adiy bir şeyge çevirildi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
