Link açıqlığı

QHA qırımtatar neşiriniñ baş muarriri Gayana Yüksel bildire ki, 10 ukrain ve qırımtatar matbuat vastası Qırımdan esas Ukrainağa köçti. Bunı o aprel 8-de Kyivdeki matbuat konferentsiyasında bildirdi.

«İşğalci akimiyetni tanımaq, alıp barılğan siyasetke razı olmaq, ifade serbestligini unutmaq, tenqit etmemek, sözde Qırım akimiyetiniñ talaplarına uyğun bir şekilde vaqialarnı aydınlatmaq. Bu haber siyaseti neticesinde mezkür deñişmelerge razı olmağan kütleviy haber vastaları yarımadadan quvuldı. Qırımdan on matbuat vastası çıqtı – qırımtatar ve ukrain – olar esas Ukrainada işine devam eteler», – dedi Gayana Yüksel.

O, Rusiyege boysunğan yarımada akimiyetiniñ Qırımda çalışqan onlarnen qırımtatar matbuat vastası aqqında malümatını oyun dep adladı.

«Yalan bu, litsenziya arizasındaki yedinci noqtada yayın tili qayd etile, mında bir çoq matbuat vastası qırımtatar tilini de yaza, Qırım Roskomnadzor hızmeti ise yarımadada qırımtatar matbuat vastaları çalışa, dep bildire. Yani, 65 kütleviy haber vastası qırımtatar tilini qayd etti ve Roskomnadzor olarnı qırımtatar matbuat vastası saya. Vaziyetni iç bir şekilde aks ettirmegen bir oyun», – dedi o.

Matbuat konferentsiyası aprel 10-da qayd etilgen Qırımtatar jurnalistikası kününe bağışlana.

Rusiye Qırımnı işğal etken soñ uquq qorçalayıcı teşkilâtlar Qırımda ifade serbestligi bozulğanını qayd etmege başladılar.

2015 senesi aprel 1-den başlap yarımadada ATR qırımtatar telekanalı, «Lâle» telekanalı, «Meydan» radiosı qapatıldı. Bu adımnı AQŞ, Avropa birligi, OSCE, Amnesty International takbih etip, oña yarımadada qırımtatarlarğa qarşı basqı dediler.

2015 senesi avgust 10-da Roskomnadzor «Millet» telekanalı ve «Vatan sedası» radiosını kütleviy haber vastaları olaraq qayd etti. Akimiyetke qoltutqan «Millet» Kremlge boysunğan TRK «Krım» («Pervıy krımskiy») telekanalınıñ qırımtatar ve milliy yayın departamenti esasında quruldı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG