Link açıqlığı

Qırımtatar jurnalistleri dünyadaki zenaatdaşlarını Qırım mevzusını unutmamağa çağıralar


Qırımtatar jurnalistleri Ukraina ve dünya zenaatdaşlarına muracaat etip, «Rusiye işğal etken Qırım aqqında kerçek malümat» yetkizmelerine qoltutmalarını istediler.

«Sizler, Ukraina ve çeteldeki zenaatdaşlarımız, Qırımda halqımıznıñ havfsızlığı az olsa da saqlap qalacağınıñ kefili olasıñız. Qırım aqqında ne qadar çoq aytsaq, işğalcige tesir etme yollarımız o qadar çoq olacaq... İmayeniñ tek bir yolu – haber alternativası ve añlaymız ki, er şeyge bizge bağlı, amma siziñ de isseñiz olmalı», – dep muracaat etti jurnalistlerge Ukraina haber siyaseti naziriniñ Qırım işlerinden mesleatçısı Emine Ceppar zenaatdaşları adına Kyivde aprel 8-de olıp keçken matbuat konferentsiyasında.

Jurnalistler videomuracaatlarında qayd eteler ki, işğal vaziyetinde Qırımda ifade serbestliginiñ olması imkânsız, mustaqil matbuat vastaları qapatıla, yarımadada çalışmağa qalğanlar ise Rusiyege boysunğan Qırım akimiyeti tarafından nezaret etile. Qırımtatar jurnalistleri qayd etkenine köre, «qırımlılar qorqa ve jurnalistlerniñ işbirliginden vazgeçeler».

«Qırımdaki vaziyetke qarşı atacağımız adım Qırım tışında doğru malümatnıñ tarqatılması ola. Zenaatdaşlarımdan rica etem, Qırım mevzusı, insan aqlarınıñ bozulması, Qırımdaki azaplar meselesi ukrain kütleviy haber vastalarında aydınlatılsın», – dep ayttı QHA neşiriniñ baş muarriri Gayana Yüksel.

Qırımtatar jurnalistleri videomuracaatlarında Rusiye işğal etken Qırımdaki vaziyetni tarif etip, zenaatdaşlarını memleket ve dünya haber alanında Qırım mevzusını aydınlatmağa çağıralar.

Rusiye Qırımnı işğal etken soñ uquq qorçalayıcı teşkilâtlar Qırımda ifade serbestligi bozulğanını qayd etmege başladılar.

2015 senesi aprel 1-den başlap yarımadada ATR qırımtatar telekanalı, «Lâle» telekanalı, «Meydan» radiosı qapatıldı. Bu adımnı AQŞ, Avropa birligi, OSCE, Amnesty International takbih etip, oña yarımadada qırımtatarlarğa qarşı basqı dediler.

2015 senesi avgust 10-da Roskomnadzor «Millet» telekanalı ve «Vatan sedası» radiosını kütleviy haber vastaları olaraq qayd etti. Akimiyetke qoltutqan «Millet» Kremlge boysunğan TRK «Krım» («Pervıy krımskiy») telekanalınıñ qırımtatar ve milliy yayın departamenti esasında quruldı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG