Qurultay Teftiş komissiyasınıñ yolbaşçısı Ali Özenbaş bildire ki, Rusiye FSB hadimleri salı künü saba Aqmescitte babasınıñ evine keldiler. Bunı o Qırım.Aqiqatqa ayttı. Onıñ aytqanına köre, silâlı uquq qoruyıcılar saba saat 6-da kelgenler.
«Kelgenler, qapunı qaqqanlar, zil çalğanlar, qoradan keçkenler, amma Allahqa şükür, qapunı sındırıp kirmegenler. Saat 8-ge qadar beklep, evde kimse olmağanını añlap ketkenler», – dep ayta o.
Ali Özenbaşnıñ aytqanına köre, kelgenlerniñ yanında silâ bar edi. «8 kişi ediler», – dedi o.
Sebebi belli – birinciden, etraftaki insanlarğa, ekinciden, maña olarnıñ küçüne boysunacağımıznı, telükesiz bir yerde olmağanımıznı ve indemememiz kerek olğanımıznı kösterecek olalarAli Özenbaş
Qırımtatar Milliy Qurultayı Teftiş komissiyasınıñ reisi qayd etti ki, o, saqlanmay ve kerek olsa, telefon etsinler dey.
«Rica etse ediler, men kelir edim ve olar bunı yahşı bileler. Yani, sebebi belli – birinciden, etraftaki insanlarğa, ekinciden, maña olarnıñ küçüne boysunacağımıznı, telükesiz bir yerde olmağanımıznı ve indemememiz kerek olğanımıznı kösterecek olalar», – dep qayd etti Ali Özenbaş.
Keçken sene dekabr ayında uquq qoruyıcılar bu adreske kelgen ediler, amma evde kimse yoq edi.
Qırımnıñ uquq qoruyıcı organları adet üzre qırımtatar faallerine yapqan «ziyaretlerini» izaatlamaylar.
Fevral ayında Avropa parlamenti Rusiye işğal etken Qırımda qırımlılar, hususan, qırımtatarlarnıñ aq-uquqlarınıñ bozulmasını takbih etip, bunıñnen bağlı rezolütsiyanı qabul etti.
Qırımnıñ Rusiye akimiyeti yarımadada insan aqları bozulmağanını bildire. Qırımtatar resurs merkezi mart ayı devamında Qırımda aq ve serbestlik bozulmasını 68 kere qayd etti. Merkez Qırımda insan aqlarınıñ bozulması artqanını bildire. Fevral malümatına binaen, 40 bozuv qayd etilgen edi.
Tintüv, yaqalav, qorquzuv, çeşit türlü yasaqlar Qırımda adiy bir şeyge çevirildi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
