Aqmescitte aprel 7-de Rusiye kontrol etken Qırım Yüksek mahkemesinde Qırımnıñ Rusiye prokurorı açtırğan Qırımtatar Milliy Meclisiniñ qapatılması davası baqıla. Mahkeme binası yanında tahminen on beş politsiya hadimi nevbetçilik yapa. 30 kişi Mecliske qoltutmağa keldi.
Qırım.Aqiqat elde etken malümatqa köre, Qırımnıñ Rusiye prokurorı Natalya Poklonskaya mahkemege kelmedi. Zalda Meclis vekilleri, şu cümleden Emine Avamileva bulunalar. Qırımnıñ Rusiye milletlerara munasebetler devlet komitetiniñ temsilcileri kelgenler, olarnı prokuratura çağırdı.
Mahkeme bu davanı mart 17-de baqqan edi. Toplaşuvnıñ büyük qısmı davacı ve davalınıñ memuriy davağa olğan munasebetleriniñ ifadelemelerinden ibaret oldı. Qırımnıñ Yüksek mahkemesi Qırımtatar Milliy Meclisini yasaq etmek davasını mart 3-te baqmağa başladı. Qabaat, Rusiye taqiqatınıñ fikirince, qırımtatar temsil organınıñ areketleri «qanunsız ve ekstremistik» olğanını isbatlağan vesiqalarnı işke ilâve etmege talap etti. Meclis reberleri prokuraturanıñ talabı yerine ketirilecek, dep tüşüneler.
Ukraina Tışqı işler nazirligi Meclis faaliyetini yasaq etecek olğan Rusiye akimiyetiniñ areketlerine qarşı narazılıq bildirdi. Birleşken Milletler Teşkilâtı Rusiye Federatsiyasını Qırımda Qırımtatar Milliy Meclisiniñ yasaq etilmesine yol bermemege çağırdı. Avropa birligi de Meclis faaliyetini yasaq etmek niyetlerinden qasevetlengenini bildirdi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
