Link açıqlığı

Ukraina Devlet sıñır hızmeti hatırlata ki, Rusiye işğal etken Qırımda berilgen nomeralar olğan maşinalar esas Ukrainağa çıqamazlar.

«İşğalciler Qırım yarımadasında bergen er angi vesiqa qabul etilmeycek. Qırım Muhtar Cumhuriyetinde Rusiye qanunlarına köre qayd olğan naqliyat vastalarınıñ vesiqaları da aynı. Bunıñ kibi maşinalar memuriy sıñırdan keçmeycek», – dep bildire matbuat hızmeti aprel 6-da.

Qayd etile ki, al-azırda Ukraina Devlet sıñır hızmetiniñ hadimleri ukrain nomeraları olğan 30 Qırım maşinası Rusiye hızmetleri tarafından yarımadağa almağanını qayd ettiler.

Rusiye uquq qoruyıcı hızmetleriniñ işğal etilgen yarımadağa kiriş/çıqış qaideleriniñ deñişmelerine dair resmiy malümatları yoq.

Rusiye akimiyeti yarımadada yaşağan vatandaşlar ve şirketlerni 2016 senesi aprel 1 kününe qadar 2014 senesi mart 18-ge qadar Ukraina qanunlarına köre berilgen qayd işaretlerini deñiştirmege mecbur etti.

Rusiye kontrol etken Qırım prokuraturası aprel 1 kününe qadar ukrain maşina nomeralarını ğayrıdan qayd etmeycek maşina saipleriniñ mesülietke çeküv tertibini belgiledi. Aprel 1-den soñ böyle aydavcılarnı sözde tenbiyelep para cezasını berecekler.

Rusiyege boysunğan Qırım parlamentiniñ deputatları mart 24-de keçirilgen sessiyada federal akimiyet organlarına muracaat etip, 2016 senesine qadar maşinanı ğayrıdan qayd etüv müddetini arttırmağa rica ettiler. Moskva buña şimdilik cevap bermedi.

Rusiye işğal etken Qırımda er kes ukrain nomeralarını rus nomeralarına deñiştirmege aşıqa. Uzun-uzun nevbetlerden sebep Qırımnıñ şimdiki prokuraturası Rayonlarara qayd-imtian bölügini (MREO) gece çalışmağa mecbur etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG