Qırımtatar resurs merkezi mart ayı devamında Qırımda aq ve serbestlik bozulmasını 68 kere qayd etti.
Merkez Qırımda insan aqlarınıñ bozulması artqanını bildire. Fevral malümatına binaen, 40 bozuv qayd etilgen edi.
«Tintüv, yaqalav, qorquzuv, çeşit türlü yasaqlar Qırımda adiy bir şeyge çevirildi», – dep qayd ete merkez.
Mında qırımtatarlarnıñ evlerinde keçirilgen tintüv, ukrain şairi Taras Şevçenkonıñ doğğan künü munasebetinen miting keçirilmesiniñ yasağı, Meclis faaliyetini yasaq etüv mahkemesi, kütleviy tedbir keçirilmesiniñ yasağı, ukrain maşina nomeraları yerine rus nomeralarını qoymaq talabı qayd etile.
Fevral 4-te Avropa parlamenti Rusiye işğal etken Qırımda qırımlılar, şu cümleden, qırımtatarlarnıñ aq-uquqları bozulmasını takbih etken rezolütsiyanı qabul etti.
Qırımnıñ Rusiye akimiyeti yarımadada insan aqları bozulmağanını bildire.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
