Rusiyege boysunğan Qırım prokurorı Natalya Poklonskaya qırımtatarlarnıñ toplu yaqalanmasına dair haberni «mühtekirlik» olaraq adlap, Aqmescitte 30-dan ziyade musulman «profilaktika tedbirlerinden» sebep yaqalanğanını bildirdi. Qırımnıñ Rusiye prokurorınıñ aytqanlarını «RİA Novosti» agentligi derc ete.
«Ukraina kütleviy haber vastaları malümatnı qarıştırıp aselet mühtekirlik yapalar. Qırımtatarlarnıñ yaqalanması aqqında laf bile yoq», – dedi Natalya Poklonskaya.
Onıñ bildirgenine köre, İçki işler nazirliginiñ Qırım idareleri, Federal migratsion hızmeti, Rusiye Federatsiyasınıñ narkotiklerni satuv nezareti Federal hızmetiniñ hadimleri gece eglence müessiseleri ve klublarda profilaktika tedbirlerini alğanlar.
«Umumen 50 kişi teşkerildi, anda rus, ukrain, qırımtatar, çeçen, dagestan ve diger milletler bar edi. Kimse yaqalanmadı, episi qıdırılamı-yoqmı teşkerildi. Episini teşkerip yiberdiler, yaqalanğanlar yoq, arizalar olmadı, insan aqları bozulmadı», – dep tüşüne Qırım prokurorı.
Onıñ aytqanına köre, bazı şahıslarğa qarşı narkotik qullanğanından memuriy bozuv protokolı tizildi.
«Bazılarını eñ çoq 2 saatke vesiqalarını teşkermek içün politsiya bölügine alıp kettiler. Şahsiyetleri ögrenilgen soñ evlerine kettiler. Kimse yaqalanmadı», – dep ayta Poklonskaya.
Qırım adliyecisi Emil Kürbedinovnıñ bildirgenine köre, aprel 1-de aqşam Qırımnıñ Colman köyündeki «Bagdad» qavehanesinde 35 musulman yaqalandı. Emil Kürbedinovnıñ bildirgenine köre, yaqalanğanlar – qırımtatarlar, olarnı Ekstremizm ile küreş merkezine «profilaktik teşkerüv» içün alıp ketken ekenler. Qavehanede bulunğan slavân sıfatlı insanlarnı birden yiberdiler, dep ayttı adliyeci.
Diger mustaqil menbalarnıñ malümatı şimdilik yoq, Qırımnıñ uquq qoruyıcı organları resmiy bir şey bildirmedi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
