Link açıqlığı

«Yel toqtağanda» filmi qırımtatar sürgünliginiñ yıllığında ekranlarğa kirecek – prodüser


Rusiyeniñ Qırım işğalinden soñ qırımtatarlarnıñ yaşayışını añlatqan «Yel toqtağanda» ukrain-poloniya filmi Ukraina ve Poloniyanıñ bir qaç şeerinde mayıs 18-de, qırımtatar sürgünliginiñ 74-ünci yıllığında, kösterilecek.

Bunı Kyivde keçirilgen filmniñ qapalı taqdim merasiminden evel prodüseri Miroslav Dembinski bildirdi, dep haber ete Qırım.Aqiqat.

«Mayıs 18-de Avropanıñ bir qaç şeerinde birden qırımtatarlar içün simvolik olğan filmni köstermek ğayemiz bar. Kyiv ve Varşavada filmniñ kösterilmesi Qırımda yaşağan qorantalar ile telekopür olacaq», – dep ayttı Miroslav Dembinski.

Film rejisseri Anyela Gabriel qayd etti ki, film Qırım işğalinden soñ yarımadada olıp keçken adise-vaqialarnı pek bilmegen seyircilerge qırımtatarlarnıñ tarihını añlatmaq içün çıqarıldı.

«Çeşit memleketler añlaycaq bir ikâyeni añlatmaq istedik, yalıñız zarar körgenler degil, er kes añlaycaq bir tilde ikâye olsun istedik... Filmde malümat çoq degil, qırımtatarlarnıñ tarihına bir kiriş... siyasetnen bağlı degil, daa çoq duyğular ikâyesi», – dedi rejisser.

Filmde Qırımda yaşağan qaramanlarnıñ adları aytılmay.

Qırımtatar halqınıñ lideri Mustafa Cemilev filmni baqqan soñ levhanıñ maneviy terenligini qayd etip, onı çoqça insan körsin istedi.

Aprel 1-de Kyivde «El toqtağanda» filmi qapalı şekilde 60 seyirjige kösterildi. Filmni «Everest» studiyası (Lodz, Poloniya), «Belsat» şirketi ve Poloniya televideniyesi çıqardılar.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG