Link açıqlığı

Qırımda qırımtatarlarnıñ toplu şekilde yaqalanması bir de bir toplaşuv keçirmelerine qarşı bir adım – Bariyev


Qırımtatar halqı aq-uquqlarını qorçalav komitetiniñ koordinatorı Eskender Bariyevniñ fikirince, aprel 1-de Aqmescit rayonınıñ Colman (Pionerskoye) köyünde 30-dan ziyade qırımtatarınıñ yaqalanması bir de bir toplaşuv keçirmelerine qarşı yapılğan bir adım, dep ayttı o Qırım.Aqiqatqa.

«Mence, işğalcilerniñ bu areketleri adamlarğa beş insandan ziyade toplaşıp oturmağa imkân bermemek içün yapıldı. İnsanlarnı qorquzacaq olalar. Adamlar laf etmek içün toplaştılar», – dep ayttı Eskender Bariyev.

Qırımtatar Milliy Meclisi reisiniñ muavini İlmi Ümerov «112 Ukraina» telekanalınıñ efirinde dedi ki, qırımtatarlar yaqalanğan qavehane «adiy» ve «içki olmağan» bir qavehane, ziyaretçiler arasında «yalıñız qırımtatarlar degil edi».

«Bu rayondaki insanlarnen bağ qurıp, tafsilâtlı malümat almağa tırışamız», – dep qoştı Eskender Bariyev.

Aprel 1-de aqşam Qırımnıñ Colman köyündeki «Bagdad» qavehanesinde 35 musulman yaqalandı. Emil Kürbedinovnıñ bildirgenine köre, yaqalanğanlar – qırımtatarlar, olarnı Ekstremizm ile küreş merkezine «profilaktik teşkerüv» içün alıp ketken ekenler. Qavehanede bulunğan slavân sıfatlı insanlarnı birden yiberdiler, dep ayttı adliyeci.

Diger mustaqil menbalarnıñ malümatı şimdilik yoq, Qırımnıñ uquq qoruyıcı organları resmiy bir şey bildirmedi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG