Qırım ve Aqyar musulmanları diniy idaresi Türkiye ve Rusiye munasebetleri kerginleşken soñ toqtatılğan Aqmescitteki Cuma Cami qurucılığı devam etkenini bildire.
«Rusiye ve Türkiye arasında yüz bergen siyasiy zıddiyet sebebinden Aqmescitte qurucılığı toqtatılğan Cuma Cami aprel 1-de yañıdan qurulmağa başladı. Qırım müftisi acı Emirali Ablayev qurucılıq işlerini ögrendi, qurucılar ve leyha mimarlarınen körüşti. Müftiniñ aytqanına köre, türk adamları yerine rus qurucılıq şirketleri kelgen olsa da, 2019 senesi obyekt azır olacaq», – dep aytıla Rusiyege boysunğan Qırım müftiyliginiñ haberinde.
«Şirketniñ mimarı ve dizayneri Dmitriy Müsinniñ bildirgenine köre, leyha azırlağanda qırımtatarlarnıñ tarihiy mirası – osmanlı üslübi – köz ögüne alınğan edi», – dep bildirdi Qırım ve Aqyar musulmanları diniy idaresiniñ matbuat hızmeti.
Planlaştırılğanına köre, cami qubbeli bina ve abdesthanelerden ibaret olacaq. Caminiñ ögü mozaika şeklinde olacaq. Qubbe 28 metrni teşkil etecek, minareler 50 metrlik olacaq. Qurucılıq meydanı 2,7 gektarnı teşkil etecek.
Yarımada musulmanları içün müim olacaq Cuma Caminiñ qurucılığı üç yıl devam etecektir.
2014 senesi Rusiye Qırımnı işğal etken soñ QAQMDİ yapqanlarını Meclis ile muzakere etmey. Yanvar 16-17 künleri Herson vilâyeti Geniçesk rayonında keçirilgen Dünya qırımtatar kongressiniñ koordinatsion şurası toplaşuvında esas Ukrainada Müftiylikni meydanğa ketirmege qarar alındı. Bir qaç biñ qırımtatarı esas Ukrainağa köçmege mecbur oldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
